Prokurorët e Strukturës së Posaçme Antikorrupsion (SPAK) kërkojnë zgjatje mandati dhe jo kufizim të tij, me justifikimin se nuk ndihen të sigurt në punën e tyre.
Kërkesa, e cila mban firmat e të gjithë prokurorëve të SPAK tashmë i është dërguar, Kuvendit dhe Komisionit për Çështjet Ligjore, Administratën Publike dhe të Drejtat e Njeriut, ndërsa është vënë në dijeni EURALIUS, OPDAT dhe Ambasada Amerikane në Shqipëri.
Referuar dokumenteve, prokurorët kërkojnë mandat të pakufizuar duke argumentuar, se gjyqtarët e Gjykatës së Posaçme Shkallës së Parë, apo prokurorët, nuk e kanë një kufizim të tillë, dhe se krimi apo korrupsion nuk zhduken me kohën. Sipas tyre, ky kufizim, i bën ata të ndihen të pasigurt ndërsa hetojnë në punën e tyre për politikanë apo funksionarë të korruptuar, dhe të shmangin frikën e kërcënimet pasi t’iu përfundojë mandati.
Po ashtu prokurorët sjellin si argument investimet që duhen bërë nga fillimi sa herë që mbaron mandati 9-vjeçar si dhe faktin që, sipas tyre, në vitin e fundit funksionarët fillojnë dhe mendojnë për të gjetur një zgjidhje të favorshme punësimi dhe kjo “shoqërohet me rënie të intensitetit dhe efektivitetit në punën që bëjnë.” Prokurorët e SPAK kanë një mandat 9 vjeçar dhe pa të drejtë rikandidimi.
Discussion about this post