Kryetari i SBASHK-ut, Rrahman Jasharaj është shprehur se nuk ndihet fajtor për vazhdimin e grevës së arsimtarëve pasi sipas tij ai është thjesht lajmësi i mësuesve.
Sipas Jasharajt, fajtor për bllokimin e procesit mësimor dhe moshapjes e shkollave është Qeveria e Kosovës, sepse nuk reflekton ndaj kërkesave të sindikalistëve. Deri në reflektimin e Qeverisë, thotë ai, nuk ka ndonjë datë të mundshme për fillimin e mësimit.
“Zgjidhje ka… Ne nuk po kërkojmë miliarda”, tha Jasharaj.
Sindikata e Arsimit kërkon nga ekzekutivi 100 euro deri në miratimin e Ligjit për Paga, në mënyrë që të përballohet inflacioni por qeveria nuk e pranon si propozim duke ofruar 50 euro pasi sipas tyre buxheti i shtetit nuk është i mjaftueshëm për të përballuar kërkesën e arsimtarëve.
Në një klimë të tillë, javën e kaluar takimi mes kryeministrit të Kosovës, Albin Kurtit dhe Rrahman Jasharajt, kryetarit të Sindikatës, s’ka prodhuar marrëveshje. Rrjedhimisht është shtuar hendeku edhe në deklarata publike.
Greva ka nisur më 25 gusht dhe ka ardhur si pasojë e mos realizimit të kërkesave të SBASHK-ut nga Qeveria e Kosovës, në mesin e të cilave është edhe kërkesa për shtesën prej 100 euro për përballimin e inflacionit deri në Ligjin për Paga. Ndërsa ministrja e Arsimit, Arbërie Nagavci të mërkurën u ka kërkuar mësimdhënësve që të ndërpresin grevën ndërkohë që kryeministri Albin Kurti nuk ka pasur asnjë reagim zyrtar.
Discussion about this post