Kjo e martë shënoi zhvillimin e protestës së nëntë para Bashkisë së Tiranës, ku pjesëmarrësit kërkuar dorëheqjen e Erion Veliajt si kryebashkiak i Tiranës dhe vënien e tij para drejtësisë. Veliaj cilësohet “pronari faktik i inceneratorit të Tiranës” dhe “koka e bandës së drejtorëve hajdutë”, ndërsa kallëzimet ndaj tij në SPAK sa vijnë e shtohen.
Tubimet nisën pas arrestimeve të drejtorëve të Veliajt lidhur me procedimin penal të njohur si “5D” dhe kanë vijuar në mënyrë periodike çdo javë. Ashtu si herët e kaluara, edhe këtë të martë organizimi ishte i ngjashëm. Me pankarta në duar, thirrje dhe fjalime nga podiumi i protestës, të pranishmit në tubimin e nisur rreth orës 11:00 kërkuan arrestimin e Veliajt dhe dorëheqjen e tij.
Duke iu referuar deklaratave të kryeministrit Edi Rama për korrupsionin, këshilltari demokrat Dorian Teliti e sfidoi më distancë. “A do ta detyrojë dot Edi Rama, Erion Veliajn, të vijë në Këshillin Bashkiak për të dhënë llogari se ku kanë shkuar 30 milionë eurot e pesë drejtorëve të tij?! A ka fuqi Edi Rama që ta detyrojë Erion Veliajn që të vijë në Këshill Bashkiak dhe të japë llogari se ku kanë shkuar 132 milionë euro e inceneratorit të Tiranës që nuk ekziston”, tha ai.
Këshilltari i PL-së, Tedi Blushi, duke e cilësuar Veliaj “kriminel”, theksoi se ai “duhet arrestuar dhe duhet nxjerrë zvarrë nga kjo godinë (bashkia), sepse ai e ka humbur besimin e qytetarëve”.
Anëtari i kryesisë së PD-së Belind Këlliçi, aktori Mehdi Malkaj dhe të tjerë mbajtën po ashtu fjalime në podiumin e protestës, duke u zotuar se tubimet do të vijojnë deri në dorëheqjen dhe vënien e Veliajt para drejtësisë.
Edhe në protestën e sotme nuk munguan molotovët apo vezët e hedhur drejt godinës së bashkisë të rrethuar nga efektivë të policisë.
Tubimi zgjati rreth 1 orë, ndërsa i radhës u lajmërua të martën e javës së ardhshme.
Veliaj nga ana tjetër ka sulmuar protestat në daljet e tij publike, ndërsa është vetdeklaruar i pafajshëm.
Ndërkohë, opozita vijon me denoncimet publike dhe kallëzimet në SPAK të të tjera aferave të dyshuara në Bashkinë e Tiranës, në qendër të së cilave është Erion Veliaj dhe zyrtarët e zgjedhur prej tij.
Së fundmi, në media është publikuar një dokument që zbulon nisjen e një hetimi pasuror për Veliajn dhe familjarë të tij nga Prokuroria e Posaçme.
Discussion about this post