Ish-deputeti dhe anëtari i Kryesisë së Partisë Socialiste, Ditmir Bushati, ka folur për herë të parë pas zgjedhjeve të 25 prillit. Në një intervistë për mediat, ish-ministri Bushati u ndal te marrëdhëniet me kryeministrin Edi Rama, duke e ritheksuar se ishte i padrejtë vendimi i këtij të fundit për të mos e kandiduar atë në zgjedhjet parlamentare të 25 prillit.
“Besoj se nuk ka diskutim që vota në Asamblenë Kombëtare ishte një lloj mbështetje për aktivitetin dhe kontributin tim, sepse PS ka investuar tek unë, siç jam përpjekur unë për të investuar dhe që do vazhdoj të jap kontributin tim në këtë forcë politike, pavarësisht funksioneve që do të mbaj ose jo. Sa i përket çështjes së kandidimit, e kam thënë që ka qenë një vendim i padrejtë në gjykimin tim, por kjo nuk më bën të heq dorë nga angazhimi im për PS dhe me PS” – është shprehur Bushati.
Bushati renditi disa elementë kryesorë, që sipas tij, mandati i tretë i PS nuk është një çek i bardhë. Ai u shpreh se PS duhet t’i ketë në fokus gjatë këtij mandati qeverisës, duke vënë theksin te reformimi i mëtejshëm i partisë.
“Njerëzit kanë besuar PS, por nuk kanë dhënë një cek të bardhë për mënyrën si duhet të qeverisë PS. Ne nuk duhet të biem në tundimin e partisë-shtet, ku mbledhjet tona, forumet tona, kryesisht flasin për çështje që kanë të bëjnë me punësimet. Në mandatin e tretë, sfida jonë do të jetë që ta vendosim PS në qendër të reformave që vendi duhet të marrë, që aktivisti, militanti socialist të jetë në qendër dhe protagonist i këtyre zhvillimeve, i politikave kryesore publike, që në finale kanë lidhje të drejtpërdrejt jo thjesht me atë që ka votuar PS, por edhe me atë që nuk e ka votuar apo kundërshton politikat e PS, sesa me atë që konsiderohet ndryshe si politika e burimeve njerëzore, kush merr një vend pune apo kush lë një vend pune, sepse populli që ka mbështetur PS është gjithmonë më i madh se anëtarësia e partisë sonë” – u shpreh ish ministri.
Kujtojmë që marrëdhënia mes kryeministrit Edi Rama dhe ish-ministrit Bushati është ftohur, që kur ky i fundit mbante akoma postin e Ministrit të Jashtëm dhe doli kundër “Minishengenit” ose siç quhet tani “Ballkani i Hapur”.
