Numri i lindjeve në Elbasan bie me 60% nga 10 vjet më parë, specialistët nuk dinë shkaqet

Numri i lindjeve në maternitetin e Elbasanit po bie vit pas viti teksa bebet që vijnë në jetë janë 60% më pak se 10 vite më parë.

Specialistët e pyetur thonë se faktorët që kanë ndikuar “janë kompleks”.

Mes shkaqeve të përmendura nga sociologët janë largimi i të rinjve nga vendi dhe kostot e larta të jetesës që sipas tyre sjellin frikë e hezitim mes prindërve të rinj.

Ndërsa shefi i repartit obstetrik-gjinekologjik në Elbasan, Olgert Alla thotë se tendenca është e njëjtë me atë në të gjithë Shqipërinë.

“Gjatë vitit 2024 në spitalin e Elbasanit kanë ardhur në jetë 1020 foshnje, shifër kjo e ulet krahasuar me disa vite më parë. Shkaqet sipas mjekëve janë të ndryshme, por në thelb është emigracioni i të rinjve. Krahasuar me 10 vitet e fundit nëse ne Elbasan vinin në jetë 5 deri ne 6 bebe në ditë, në këtë periudhe mjekët theksojnë se mund të ketë një ose dy lindje.”

“Është bërë trend tashmë prej shumë vitesh që numri i lindjeve tek ne ka ardhur në ulje si në të gjithë Shqipërinë. Ketë vit kemi qenë me 30 lindje më pak me rreth 1020 lindje sivjet, vitin e kaluar kemi pas 1050 lindje, është në ulje. Në vitet e fundit kemi pasur ulje edhe me të mëdha, gati 100 lindje më pak vit për vit”, shton Alla.

Në pesë vitet e fundit lindjet në Shqipëri u ulën me 22.2% dhe kjo nuk mund t’i faturohet vetëm emigracionit por rënies së fertilitetit dhe përkeqësimit të shëndetit të përgjithshëm të popullatës.

Viti 2023 shënoi rekord në rënie të madhe të lindshmërisë në vend, me një total prej 22.210 bebesh, niveli më i ulët që nga 1934.