Nuri Belba harxhon 20 milionë lekë për të lyer dhe dezinfektuar zyrën, tenderi denoncohet në KPP

Nuri Belba po dezinfekton Bashkinë Prrenjas, por abuzimi që bren arkën e bashkisë është një virus që vetëm SPAK-u e çrrënjos. Ndërsa kryetari do të shpenzojë 20 milionë lekë për të lyer dhe dezinfektuar zyrat e bashkisë. Tenderin po e bën me dy lote që nuk kanë lidhje me njëri tjetrin sepse kanë objekt të ndryshëm. Kjo është një ngatërresë për të vështirësuar aplikimin e operatorëve në këtë tender.

Siç shohim në dokumentet më poshtë, bëhet fjalë për prokurimin me objekt “Shpenzime për lyerje meremetime, dezinfektim ambientesh në varësi të bashkisë Prrenjas me lote :

LOTI 1:  Shpenzime për lyerje mermetime ambientesh në varësi të bashkisë Prrenjas me vlerë 16 milionë lekë

LOTI 2: Dezinfektim ambientesh të institucioneve në varësi të bashkisë Prrenjas” me vlerë 4 milionë lekë.

Përveç shpenzimit pa kriter dhe gabimeve të shumta drejtshkrimore në dokumente, Belba ka bërë edhe shkelje ligjore në këtë prokurim, që e kanë çuar çështjen deri në KPP.

Denoncimi

Në datën 15 korrik 2024, nëpërmjet Sistemit të Ankesave Elektronike pranë Komisionit të Prokurimit Publik, është administruar ankesa e operatorit ekonomik “T&J Construction” . Kjo ankesë është bërë vetëm për  “Loti 1 Shpenzime për lyerje mermetime ambientesh në varësi të Bashkisë Prrenjas”.

Nga shqyrtimi paraprak i ankesës të sipërcituar, u konstatua se objekti i ankesës lidhet me vendimmarrjen e Komisionit të Vlerësimit të Ofertave mbi skualifikimin e ofertës të paraqitur nga operatori ekonomik “T&J Construction” SHPK.

Konkretisht sipas të dhënave, firma në fjalë nuk ka dorëzuar dokumentet që  tregojnë se ka kryer punë të ngjashme më parë në të njëjtat nivele shpenzimesh.

“OE T&J Construction shpk nuk ka arritur te përmbushë kriterin nr. 2.3 te Kapacitetit Teknik ku është kërkuar : 2.3 Kapaciteti teknik: 2.3.1 Operatori ekonomik duhet të paraqesë dëshmi për furnizimet e mëparshme të ngjashme të kryera gjatë 3 (tre) viteve të fundit nga data e shpalljes së njoftimit të kontratës, në vlerën jo më te vogël se 20% e vlerës së fondit limit te kontratës/lotit. Këto furnizime të mëparshme, të ngjashme”, thuhet në justifikimin zyrtar të komisionit të Belbës.

Por, ankimuesi nuk e pranon këtë argument si arsye për skualifikim nga gara që në fazën e parë, sepse në fakt edhe ligji kërkon që në këto raste operatorët që dorëzojnë ofertë ekonomike duhet të njoftohen për mangësitë që kanë në dokumentacion dhe t’iu lihet një afat për kthim përgjigje.

Këtë detyrim Belba nuk e ka zbatuar, por i ka rënë rrugës shkurt duke skualifikuar “T&J Construction” SHPK. Kjo e fundit e ka denoncuar në KPP duke ngritur pretendimin se gjithçka bëhet për të favorizuar ndonjë operator specifik.

©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.