Pak ditë më parë është bërë publik në media rasti i nxënësit me aftësi të kufizuara Emiliano Liçi, të cilin drejtoresha e kishte përjashtuar nga shkolla. U desh denoncimi në media dhe buja që bëri ky lajm, për të vënë në lëvizje Ministrinë e Arsimit. Ministrja Evis Kushi ka reaguar sot përmes një postimi në Facebook lidhur me këtë çështje. Ajo tha se janë marrë masa të menjëhershme, duke pezullua nga puna drejtoreshën dhe Emiliano do të kthehet në shkollë.
“Pas denoncimit nga emisioni “Stop” në TV Klan të rastit të nxënësit Emiliano Liçi, i cili nuk është lejuar të vazhdojë frekuentimin në Shkollën e Mesme të Bashkuar “Mihal Nako” në Fierseman, Ministria e Arsimit dhe Sportit, në bashkëpunim me Drejtorinë e Përgjithshme të Arsimit Parauniversitar, pas verifikimeve paraprake, ka vendosur pezullimin e menjëhershëm të drejtoreshës së shkollës dhe drejtorit të Zyrës Vendore Arsimore Divjakë.
Ndërkohë, nxënësi Emiliano Liçi do të kthehet menjëherë në bankat e shkollës, që nga dita e hënë 28 Mars 2022, pas kryerjes së të gjitha procedurave përkatëse nga ana e shkollës, në bashkëpunim edhe me mësuesin ndihmës, punonjësin e shërbimit psiko-social dhe familjen, me qëllim që Emiliano të ketë të gjithë mbështetjen dhe kujdesin e duhur”, u shpreh Kushi. Edhe pse u kujtua pak me vonesë për këtë raste, edhe për shumë raste të tilla të ngjashme ministria tregon indiferentizëm, sot Kushi deklaroi se do të përforcohet ligji për shkollat që trajtojnë personat me aftësi ndryshe. Ajo tha se parashikohet që këto ndryshime, pasi të konsultohen me të gjitha grupet e interesit, të finalizohen me miratimin në Parlament brenda vitit 2022.
Discussion about this post