Kreu i Organizatës Botërore të Shëndetësisë tha se vendet më të pasura duhet t’i shtyjnë planet për të vaksinuar fëmijët dhe adoleshentët, dhe t’u dhurojnë vaksina vendeve me të ardhura të ulëta, ku ende një pjesë e madhe e të moshuarve nuk është vaksinuar. Tedros Adhanom Ghebreyesus u bëri thirrje vendeve të sigurojnë më shumë vaksina me skemën globale Covax.
Shpërndarja ndërkombëtare e vaksinave Covid vazhdon të mbetet me një nivel të lartë pabarazie. Që kur vaksinat e para u miratuan në dhjetor, vendet më të pasura kanë blerë pjesën më të madhe të furnizimit. Shumë prej vendeve me standart të lartë jetese po garojnë për të vaksinuar sa më shumë grupmosha nga popullata e tyre.
Në konferencën virtuale, Ghebreyesus shtoi se në vendet me të ardhura të ulëta dhe të mesme, furnizimi me vaksina anti-covid-19 nuk ka qenë i mjaftueshëm për të imunizuar punonjësit e kujdesit shëndetësor, dhe spitalet po përmbyten nga njerëz që kanë nevojë për ndihmën e mjekëve.
Skema Covax u zhvillua me synimin për të vaksinuar së pari 20% të popullsisë në 92 vendet e varfra që u regjistruan, duke filluar me punonjësit shëndetësorë. Skema drejtohet nga OBSH, Aleanca Globale e Vaksinave dhe Koalicioni për Inovacione të Gatishmërisë Epidemike, me Unicef, si partneri kryesor i zbatimit.
OBSH ka theksuar se kjo është një katastrofë morale, e cila mund të ndikojë shumë keq në vendet me të ardhura të ulëta.
