Teatri Metropol sjell në skenën premierën absolute “Oh ato ditë të bukura” të Samuel Beckett me regji nga Arben Kumbaro. Vepra e cila është cilësuar një nga më të njohura të teatrit modern botërorë, do të interpretohet nga “Mjeshtre e madhe” e skenës, Yllka Mujo, shoqëruar dhe nga interpretimi i aktorit të mirënjohur Sokol Angjeli.
Regjisori shprehet se qëllimi i kësaj shfaqjeje një reflektim mbi kuptimin e jetës njerëzore, një përpjekje për të rikthyer shpresën në shoqërinë tonë.
“Qëllimi i vënies së kësaj shfaqje është gjallërimi i jetës kulturore në Tiranë në këtë kohë fatkeqe të pandemisë. Vepra është në kufijtë e një monodrama dhe do interpretohet nga një prej aktoreve më të shquara të traditës tonë teatrale, Yllka Mujo. Duke qenë se jetojmë brenda mundësive krejtësisht të limituara fizike, kërkesat që ka ky projekt e bën krejtësisht të mundur realizimin e tij. Vepra ka vlera të jashtëzakonshme aktuale dhe është një ulërimë dhe reflektim mbi kuptimin e jetës njerëzore. Një përpjekje në rikthim të shpresës në shoqërinë tonë”- shprehet regjisori Arben Kumbaro.
Shfaqja ka një skenografi minimaliste, ku Yllka Mujo ka mbi vete gjithë barrën e skenës dhe veprimit skenik, në të shumtën e përmbledhur në pjesën e sipërme të trupit e kryesisht portreti, çka e bën më shumë sfidë për aktoren.
Një autor i madh, një regjisor i madh dhe një aktore e madhe, ne një salle te vogël. Për Kumbaron zgjedhja e teatrit Metropol ka një arsye. “Ne teatrin Metropol doja intimitet e gjeta endrra”, tha Kumbaro. Premiera do jete çdo fundjave nga data 8 tetor deri ne date 31 ne orën 19:00 në teatrin Metropol.
