SPAK ka vendosur rifillimin e hetimeve lidhur me dyshimet se vëllai i kryeministrit Edi Rama, Olsi është pjesë e grupit të kokainës “Xibraka”.
Lajmin e ka konfirmuar kreu i grupit parlamentar demokrat Gazment Bardhi, i cili ka depozituar më herët në SPAK, dokumente lidhur me rastin.
“SPAK më ka njoftuar zyrtarisht për rifillimim e hetimeve të pezulluara për përfshirjen e Olsit Ramës në dosjen e trafikimit të kokainës në Xibrakë. Procedimi i dikurshëm penal me nr. 335/1-2016, është regjistruar si procedimi nr. 88 – viti 2024. Për këtë çështje jam ftuar për të dhënë sqarime të metejshme në SPAK. Asnjë propagandë e Edi Ramës, veglave të tij apo mediave në shërbimin e tij nuk e fshehin dot të vërtetën dhe as makinën e kartelit të drogës me targë AA 653 DM, e përdorur nga Olsi Rama, vëllai i kryeministrit Edi Rama”, shkruan Bardhi në një postim në “FB”.
Deputeti është njoftuar nga SPAK të paraqitet në prokurori të mërkurën e ardhshme, për tu pyetur si person që ka dijeni për çështjen.
Mes Bardhit dhe kryeministrit ka pasur replika në distancë lidhur me denoncimin publik nga deputeti demokrat për Olsi Ramën.
Denoncimi
Më 28 Mars, Bardhin denoncoi nga selia blu se Olsi Rama është trafikant i dosjes së kokainës “Xibraka”, por i ka shpëtuar drejtësisë për shkak të favorizimit nga policia dhe prokuroria e kohës.
Ai zbuloi dokumente të sistemit TIMS, që siç u shpreh, tregojnë se Olsi Rama dhe drejtuesit e grupit kriminal të kokainës kanë përdorur të njëjtin automjet, gjatë periudhës Prill – Dhjetor 2014. Bardhi tha se një procedim penal i ri nisi si derivat i dosjes së Xibrakës që kishte në qendër një person të pa identifikuar “i moshës 45 vjeç me flokë të shkurta” i cili sipas hetuesve, dyshohej se ishte pjesëtar i grupit që u godit nga autoritetet vendase pas sinjalizimeve nga homologët gjermanë. Ky person, deklaroi demokrati, është pikërisht Olsi Rama.
Si Edi Rama, ashtu dhe i vëllai Olsi, kanë mohuar akuzat.
Discussion about this post