Ish-kryeministri Sali Berisha ka renditur për ndjekësit e tij në rrjetin social “Facebook” katër arsye për të marrë pjesë në protestën e thirrur nga ai kundër nismës “Open Balkan”. Berisha thotë se presidenti i Serbisë, Aleksandar Vuçiç nuk ka kërkuar ende falje për krimet e luftës ndaj Kosovës, teksa e akuzon se ndjek politikën e Millosheviçit. Ai shprehet se “Open Balkan” i shërben planeve të Serbisë së Madhe ndaj nuk duhet konkretizuar si nismë, teksa Ramën e cilëson si kukull të Vuçiçit. Sipas Berishës, Kosova ende i ka plagët e luftës të hapura, përgjegjëse për të cilat është edhe Vuçiç, i cili nuk është i denjë për tu pritur në kryeqytetin e Tiranës.
“1.Vuçiç është ministër i Millosheviçit. Ai akoma nuk ka kërkuar falje për krimet e kryera ndaj shqiptarëve nga Serbia dhe vazhdon të ndjekë politikën e shefit të tij.
2.Ballkani i Hapur është projekt që e rrit dhe forcon Serbinë dhe planet e Serbisë së Madhe ndaj nuk duhet lejuar asesi që të konkretizohet.
3.Edi Rama po bëhet pjesë e këtyre agjendave dhe është bërë një kukull e Vuçiçit, andaj duhet ta ndalim para se të bëhet vonë.
4.Kosova ka akoma plagë të hapura për të cilat Vuçiç është nga përgjegjësit kryesorë. Përveç kësaj, ai edhe mohon krimet, masakrat dhe gjenocidin e kryer ndaj shqiptarëve të Kosovës në luftë, andaj nuk është i denjë që të pritet në Tiranë e aq më pak që të bashkëpunohet me të”, liston Berisha.
Ish-kryedemokrati Sali Berisha ka deklaruar se ditën e sotme në orën 16:00 do të nis protesta kundër nismës “Open Balkan”, ku ai sëbashku me qytetarët që do t’i bashkohen, do të marshojnë drejt Kryeministrisë.
Discussion about this post