Eliminimi i Gjermanisë nga Kupa e Botës nuk është kriza e vetme që po trondit futbollin gjerman.
Vetëm pak orë pas humbjes dramatike ndaj Paraguait, Federata Gjermane e Futbollit (DFB) është përballur me një bastisje të gjerë policore në selinë e saj në Frankfurt.
Sipas raportimeve të mediave gjermane, mbi 150 efektivë policie morën pjesë në operacion, duke kontrolluar jo vetëm zyrat e DFB-së, por edhe disa bashki që ishin qytete organizatore të Euro 2024.
Hetimet lidhen me dyshimet për shpërndarje të paligjshme të përfitimeve, ku zyrtarë publikë dyshohet se kanë marrë bileta falas, udhëtime dhe akomodime luksoze gjatë Kampionatit Evropian, përfitime që autoritetet po i trajtojnë si raste të mundshme ryshfeti.
Ministri i Brendshëm i Gjermanisë, Herbert Reul, ishte i prerë në reagimin e tij.
“Një biletë futbolli nuk është pjesë e pagës. Kushdo që punon në shërbimin publik dhe pranon përfitime të tilla duhet të presë që policia t’i trokasë në derë”, deklaroi ai.
Sipas hetimeve, dy persona të lidhur me komitetin organizues të Euro 2024 dyshohet se kanë shpërndarë bileta falas për gjysmëfinalen mes Spanjës dhe Francës, ndërsa po verifikohet edhe mënyra se si qytetet organizatore kanë përdorur të drejtën prioritare për blerjen e biletave.
Ndërkohë, në aspektin sportiv, situata mbetet po aq shqetësuese.
Gjermania u eliminua nga Paraguai pas penalltive në fazën e 1/16-tës, duke regjistruar një tjetër dështim të madh në Kupën e Botës.
Pas ndeshjes, trajneri Julian Nagelsmann nuk u fsheh pas justifikimeve.
“Nëse nuk arrin ta mposhtësh Paraguain në 120 minuta, atëherë e meriton eliminimin. Nuk mund të konsiderohemi më një kombëtare e nivelit të parë”, tha trajneri i “Panzerave”.
Pas këtij dështimi, presioni mbi Nagelsmann është rritur ndjeshëm, ndërsa në mediat gjermane kanë nisur spekulimet se Jurgen Klopp mund të jetë kandidati kryesor për të marrë drejtimin e kombëtares nëse federata vendos të ndryshojë trajner.
Discussion about this post