Një aksion i madh i Europol dhe policisë amerikane, çoi në arrestimin e 150 trafikantëve të drogës në mbarë votën. Bëhet me dije se është shkatërruar një rrjet i madh i shitjes së drogave të ndryshme, të cilat prodhoheshin në Meksikë e më pas bëhej shpërndarja e tyre në Amerikë dhe Europë.
Sipas njoftimit të bërë, ky rrjet funksiononte në mënyrë online ku kishin lidhur dhe kontaktet me njëri-tjetrin.
Zëvendës Prokurorja e Përgjithshme e Shteteve të Bashkuara, Lisa Monaco ka njoftuar se falë bashkëpunimit të organeve ndërkombëtare të ligjit, 150 trafikantë droge, që përdornin hapësirën e errët kibernetike janë arrestuar në disa vende, përfshirë 65 në Shtetet e Bashkuara.
Arrestimet janë bërë në Australi, Britani, Bullgari, Francë, Gjermani, Itali, Hollandë dhe Zvicër. Në lidhje me aksionin është bërë një hetim 10 mujor, i cili rezultoi në sekuestrimin e 243 kilogramëve drogë, përfshirë amfetaminë, kokainë dhe opioide, që kapin vlerën e më shumë se 31 milionë dollarëve.
Hetuesit thanë se ato prodhoheshin kryesisht në laboratorë në Meksikë duke përdorur kimikate të importuara nga Kina. Prokurorët gjithashtu vunë në shënjestër edhe tregtarët e drogës që operonin laboratorë shtëpiak për të prodhuar pilula kundër dhimbjeve.
Ndër të tjera, zyrtarët amerikanë pohuan se hetimet do të vazhdojnë e pritet të ketë të tjerë persona të arrestuar.
