Policia e Elbasanit ka ndalur dy automjete, një “Audi” dhe një “Porche” në unazën kryesore të këtij qyteti, në aksin Elbasan-Librazhd, pranë vendit të quajtur karburant besmiri mjetet vinin nga Pogradeci.
Sipas burimeve, dyshohet se ne dy automjetet udhëtonte i shumëkërkuari që i mori jetën kamarierit Gazment Kurmaku.
Por pas verifikimit rezultoi se i kërkuari Erjon Llapushi, nuk ishte në asnjërin nga mjetet e shoqëruara nga Policia e Elbasanit.
Në fillim të muajit tetor, Erjon Llapushi shkoi së bashku me një tjetër person në kompleksin në dalje të qytetit të Elbasanit, në aksin në drejtim të Librazhdit. Shefi i shërbimit të restorantit, Gazment Kurmaku i kërkoi që të ngrihej nga tavolina ku ishte ulur, pasi ishte e rezervuar dhe të ulej në një tjetër, por Erjon Llapushi nuk pranoi.
Situata u agravua dhe Erjon Llapushi e goditi Kurmakun, i cili përfundoi në spital në gjendje të rëndë dhe disa ditë më pas vdiq në spitalin e Traumës në Tiranë.
