Prokurori i Vlorës, Maksim Sota, emri i të cilit u bë i njohur gjatë operacionit ndërkombëtar “Shpirti”, e i akuzuar për “shpërdorim detyre” i kërkon Gjykatës së Apelit të Posaçëm ndryshimin e masës “arrest në shtëpi ndaj tij”.
Prokurori kërkon në Apel që të shfuqizohet kjo masë dhe të zëvendësohet. Kërkesa e tij sipas gazetares, do të shqyrtohet nga gjyqtarja Saida Dollani. Kujtojmë se gjatë operacionit “Shpirti” u bënë një sërë arrestimesh, mes biznesmenëve të njohur dhe 2 ish-truprojave të ish-ministrit të Brendshëm Saimir Tahiri.
Emri i Sotës doli gjatë dëshmisë së 2 skafistëve, të cilësuar si të penduarit ndaj drejtësisë. Ata pretendonin se Sota, qëndronte në një apartament me qira në Vlorë të paguar nga krerët e bandave. Prokurori nga ana e tij i ka mohuar këto zëra, duke shtuar se goditja e tij është e qëllimshme.
Operacioni “Shpirti”:
Operacioni “Shefi” dhe operacioni “Kulmi”, të zhvilluara përkatësisht në vitet 2018 dhe 2020 vijuan me operacionin “Shpirti”, me qëllim luftimin kundër trafikimit ndërkombëtar të drogës. Gjatë këtij operacioni, u zbulua dhe mënyra e organizimit të këtij zinxhiri të prodhimit të lëndëve narkotike. Ndërkohë, në cilësinë e provës materiale u sekuestruan 4 milionë euro. Kujtojmë se 28 të arrestuarit në kuadër të operacionit “Shpirti” janë shtetasit me iniciale A. M., J. M., A. N., Sh. K., B. T., M. Ç., E. H., K. A. H., T. E. K., E. H., Ç. Gj., M. Ll., Sh. D., E. B., H. S., L. S., I. G., L. Z., G. Z., E. Z., A. Z., A. K., banues në Vlorë, i cili akuzohet për veprën penale “Shpërdorim detyre”. Përveç tyre, pjesë e të arrestuarve janë dhe ish-drejtori i Zyrës së Punës në Bashkinë e Kavajës, Saimir Kuriti, ish-shoqëruesit e ish-ministrit të Brendshëm Saimir Tahiri, Paul (Agustin) Deda dhe Hekuran Marku. Për të tre këta të pandehur rëndon akuza e veprave penale “Trafik të lëndëve narkotike” dhe “Grup i strukturuar”. I përfshirë gjithashtu, është edhe ish-efektivi i policisë, shtetasi F. L., i dënuar për trafikim të lëndëve narkotike dhe i akuzuar për veprën penale “Shpërdorim detyre”. Sigurisht i përfshirë, siç u tha dhe më sipër ishte edhe ish-prokurori i Vlorës, Maksim Sota, të cilit së fundmi iu refuzua kërkesa e rikthimit në pronësi të makinës së tij, pasi Apeli i GJKKO e sekuestroi si cilësi të provës materiale të veprave penale të kryera nga Sota.
