Opozita e bashkuar ka prezantuar zyrtarisht mbrëmjen e djeshme kandidatin për zgjedhjet vendore 2023 për bashkinë e Beratit. Do të jetë mjeku Zija Ismaili ai që do të kandidojë në garën elektorale të 14 majit. Demokatët beratas, së bashku me përfaqësues të lartë të Partisë së Lirisë, prezantuan kandidatin e tyre, të bindur se në vend duhet një ndryshim për t’ia kthyer qeverisjen qytetarëve dhe jo pushtetarëve të korruptuar që e kanë mbajtur peng bashkinë e Beratit për vite me radhë.
Deputeti i Partisë Demokratike, Tomorr Alizoti ka theksuar se padrejtësia që i është bërë Partisë Demokratike e ka mbushur sallën plot me demokratë sepse PD-ja nuk është “vulë” por është emocion, është partia e demokratëve, partia e njerëzve të lirë.
Alizoti i ka bërë thirrje Berishës të mbledhë demokratët anembanë Shqipërisë që ndihen të poshtëruar. Tashmë – ka thënë Alizoti – është tamam koha për revolucion për ta çuar Edi Ramën atje ku e meriton dhe ndryshimi do të fillojë nga Berati.
Kryetari i Partisë së Lirisë në Berat, Petrit Sinaj, ka deklaruar se, masiviteti në prezantimin e kandidatit të opozitës së oashkuar tregon se qytetarëve u ka ardhur në majë të hundës qeverisja vendore dhe ajo qendrore dhe duan sa më shpejt ta largojnë. Ne – ka thënë Sinaj – jemi në momentin e duhur dhe në kohën e duhur për të bërë ndryshimin që kërkohet nga qytetarët beratas dhe të gjithë Shqipërisë.
Kandidati Ismaili, u ka bërë thirrje demokratëve beratas të bashkohen për të sjellë ndryshimin e madh në Berat.
Kandidatët e dalë nga primaret që u zhvilluan në Partinë Demokratike, do të përfaqësohen në zgjedhjet e 14 Majit nën siglën e një koalicioni, që ende nuk është bërë publik.
Discussion about this post