Opozita padi në Kushtetuese kundër ndryshimeve në ligjin e Akademisë së Shkencave

Deputetja e Partisë Demokratike, Ina Zhupa dorëzoi sot në Gjykatën Kushtetuese një padi kundër ndryshimeve të ligjit për Akademinë e Shkencave.

Në një prononcim për mediet, Zhupa bëri të ditur se padia është firmosur nga 37 deputetë të opozitës.

Sipas saj, ligji i miratuar në Kuvend shkel barazinë e garantuar nga Kushtetuta dhe garanton vetëm “futjen e hundës së politikës” në Akademinë e Shkencave.

Zhupa theksoi se “ky ligj u bë për të dhunuar akademizmin, për të politizuar Akademinë e Shkencave”.

“Është një ligj antikushtetues, pasi edhe në procedurë po edhe në përmbajtje ka shkelje flagrante të Kushtetutës dhe është një ligj që garanton atë që grupe të caktuara brenda PS, të përfaqësuar nga deputetë Koçi dhe Beqiraj duan të arrijnë, që mbasi të mbarojnë karrierën aktive si deputetë në Kuvend deputetët e këtij grupi parlamentar, të kalojnë në një pension luksi në Akademi”, u shpreh Zhupa.

Ajo theksoi se ndryshimet kanë krijuar pabarazi në Akademi.

“Akademikët mbi 75-vjeç bëhen akademikë meritues dhe zhvishen nga detyrimet dhe kanë vetëm të drejta. Kam advokuar për një Akademi shkencash larg politikës, që prodhon për interesin publik e pandikuar nga politika”, tha.