Kryeministri i Hungarisë, Victor Orban, përsëriti mbështetjen e vendit të tij për integrimin europian të Ballkanit Perëndimor, në një konferencë të përbashkët për mediat me kryeministrin Edi Rama, pas vizitës së këtij të fundit në Budapest.
“Vendet e Ballkanit Perëndimor kanë pritur për 15 vite mesatarisht për t’u bërë pjesë e BE, ndërsa Shqipëria ka pritur që prej vitit 2019. Unë në fakt kam folur për këtë edhe në Strasburg sepse mendoj që kura më e mirë për këtë situatë është që BE t’i mirëpresë vendet e Ballkanit Perëndimor në BE, sepse kështu gjaku qarkullon më mirë tek ne në familjen europiane”, tha Orban.
“Shqipëria duhet të ishte pjesë e BE dhe duhet të jetë edhe tani. Por edhe pse po shohim pengesa politike, javën e ardhshme do të kemi konferencën e parë ndërqeveritare dhe do të hapen kapitujt e parë. Dhe më vjen shumë mirë kjo ndodh nën presidencën tonë. Herën e fundit që kemi pasur diskutime të tilla kanë qenë kur ne kemi qenë në presidencë dhe Kroacia u bë anëtare e BE. Dhe që atëherë nuk kemi pasur anëtarësime të tjera në BE”, shtoi ai.
Nga ana tjetëe, Rama i shprehu mirënjohjen Hungarisë për atë që ka bërë për vendin tonë në rrugën drejt integrimit në Bashkimin Europian.
“Shpreh mirënjohjen time për atë që ka bërë Presidenca e Hungarisë për ne, duke bërë të mundur që pas disa ditësh të hapim një grup të tërë kapitujsh për integrimin e Bashkimin Europian. Është momenti për të falënderuar edhe Oliver Varhelyn, i cili na ka shoqëruar për 5 vite dhe ka qenë kyç për arritjet tona të rëndësishme. Ka qenë kënaqësi që të punonim me të dhe i urojmë suksese në të ardhmen. Ne e kemi parë gjithmonë Hungarinë si shembull sa i takon reformave të brendshme në administratë e qeveri. Ne kërkojmë të mësojmë gjithmonë e më shumë nga Hungaria. Sot biseduam se si mund ta zgjeronim bashkëpunimin tonë, që më shumë është ndihmë nga Hungaria drejt nesh. Sot nënshkruam dy marrëveshje, një në bujqësi dhe një në administratën publike, që është shumë e rëndësishme për të gjithë ata që janë në rrugën e anëtarësimit në BE”, tha Rama.
Më tej, kreu i qeverisë theksoi se “kompanitë hungareze po investojnë shumë në Shqipëri, duke u krahasuar me vende me madhësinë e Shqipërisë”.
Discussion about this post