OSBE e shqetësuar për incidentet ndaj gazetarëve: Liria e medias, gur themeli i demokracisë

Prezenca e OSBE-së në Shqipëri ka reaguar lidhur me situatën e krijuar ndaj gazetarëve gjatë procesit zgjedhor të fundit, duke shprehur shqetësim për rastet e raportuara të frikësimit dhe pengesave ndaj përfaqësuesve të medias. Në një deklaratë për mediat, OSBE nënvizon rëndësinë e mbrojtjes së gazetarëve dhe garantimit të një mjedisi të lirë dhe të sigurt për punën e tyre, duke e cilësuar këtë si një element kyç për funksionimin demokratik të një shoqërie. Deklarata e plotë: “Prezenca e OSBE-së në Shqipëri shpreh shqetësimin e saj lidhur me incidentet e raportuara ndaj gazetarëve para, gjatë dhe pas zgjedhjeve të fundit, përfshirë rastet e frikësimit dhe të pengesave. Theksojmë edhe një herë rëndësinë jetike të lirisë së medias si një gur themeli i demokracisë dhe jemi të gatshëm të mbështesim çdo përpjekje për të respektuar angazhimet në kuadrin e OSBE-së për mbrojtjen e gazetarëve dhe sigurimin e një mjedisi mediatik të sigurt dhe të hapur.”