Presidentja e Kosovës, Vjosa Osmani, ka shprehur ngushëllime për vdekjen e Haxhi Thaçit, babait të ish-presidentit, Hashim Thaçi.
Osmani tha se kontributi dhe dashuria e tij për atdheun, do të shndërrohen në udhërrëfyes dhe kujtime krenarie për të gjithë ata që e njohën.
“Me pikëllim mësuam lajmin për ndarjen nga jeta të z. Haxhi Thaçi, babait të ish-Presidentit dhe ish-Kryeministrit të Republikës së Kosovës, z. Hashim Thaçi. Humbja e babait është dhimbje e pamatshme, e cila lë boshllëk të pazëvendësueshëm tek më të dashurit. Kontributi dhe dashuria e tij për atdheun, shpresoj të shndërrohen në udhërrëfyes dhe kujtime krenarie për të gjithë ata që e njohën. Në emrin tim dhe në emër të popullit të Kosovës, ju shpreh ngushëllimet më të sinqerta ish-Presidentit Thaçi, gjithë familjes Thaçi, si dhe miqve e të gjithë të afërmve të z. Haxhi Thaçi. Qoftë i përjetshëm kujtimi tij”, shkroi presidentja.
Haxhi Thaçi ndërroi jetë të dielën pas një periudhe të gjatë sëmundjeje. Lajmi u bë i ditur nga kryetari i Partisë Demokratike të Kosovës (PDK), Memli Krasniqi, i cili shprehu ngushëllime për familjen Thaçi dhe të gjithë popullin shqiptar.
Ai ishte i shtruar në spitalin e Prishtinës për trajtim, ndërsa më 13 mars 2025, ish-presidenti Hashim Thaçi, aktualisht në paraburgim në Hagë, kishte marrë leje për të vizituar babanë e tij.
Discussion about this post