Osmani: Terroristët nuk na frikësojnë, vetëm na forcojnë

Presidentja Vjosa Osmani ka shprehur solidaritetin e saj me Policinë e Kosovës, ndërsa situata në veri vazhdon të jetë e tensionuar.

“Në misionin fisnik, në mbrojtje të integritetit e sovranitetit të Republikës së Kosovës, jemi të gjithë në krah të Policisë së Kosovës”, ka shkruar Osmani në Facebook.

“Të gjithë bashkë me një mesazh: Terroristët s’na zmbrapsin, por vetëm e forcojnë vendosmërinë tonë! Faleminderit heronjve tanë në uniformë! Kosova është e përjetshme!”, ka shkruar Osmani.

Policia e Kosovës është sulmuar sot me arsenal armësh, përfshirë këtu edhe me granata dore dhe zollë, ku si pasojë e gjuajtjeve një polic është vrarë dhe një tjetër është plagosur.

Policia e Kosovës ka bërë të ditur po ashtu se edhe 3 agresorë janë vrarë në veri të Kosovës. Shkëmbimet me armë zjarri mes Policisë dhe agresorëve janë duke vazhduar.