Dy ditë pasi depozituan në Gjykatën Kushtetuese kërkesën për të shfuqizuar si anti-kushtetuese ndryshimet e bëra në ligjin për vetëqeverisjen vendore, LSI ka reaguar sërish.
Në një deklaratë për mediet, sekretari i Përgjithshëm i LSI, Endrit Braimllari tha se qeveria i hoqi fuqinë e votës Këshillave Bashkiakë, ndonëse të njëjtin ligj e kishin miratuar po vetë me justifikimin se do të shmangte abuzimet.
“Mazhoranca në funksion të rrëmbimit të pronës publike, i hoqi fuqinë e votës së cilësuar Këshillave Bashkiakë për çështje të rëndësishme të interesit publik, duke e zëvendësuar atë me votim të thjeshtë. Ju kujtojmë, që ky ligj u miratua po nga rilindja për t’i dhënë fuqinë e votës së cilësuar Këshillave Bashkiakë, si garanci për të shmangur abuzimet, për të përmirësuar vendimmarrjen si një mënyrë kontrolli dhe transparence për çështje me interes të madh publik duhej marrë vota e cilësuar, si një votë e cila përfaqëson vullnetin e pjesës më të madhe të qytetarëve”.
Braimllari shprehet se ky ndryshim rrit abuzimin e kryetarëve duke i kthyer bashkitë në prona private, ndërsa shtoi se LSI do vazhdojë aksioni e saj për të mbrojtur interesin publik.
“Ky ndryshim rrit abuzimin e kryetarëve të bashkive duke i kthyer bashkitë në prona private, si në rastin e teatrit kombëtar por dhe prona të tjera në të gjitha bashkitë e vendit të cilat po i jepen klientëve të qeverisë. Lëvizja Socialiste për Integrim do të vazhdojë aksionin e saj të drejtpërdrejtë në mbrojtje të interesit publik. Iniciativa të tilla, të ligjeve anti-kushtetuese të kaluara nga një qeveri dhe parlament monist do të jenë pjesë e aksionit tonë opozitar”, tha ai.
Dy ditë më parë, ish-deputetja Silva Caka, ankimoi në Gjykatën Kushtetuese ndryshimet dhe shtesat në ligjin për “vetëqeverisjen vendore” me justifikimin se tjetërsojnë kompetencat e Këshillit Bashkiak në lidhje me pronat publike dhe dhënien e tyre në përdorim ndaj personave të tretë.
