Pas propozimit për të marrë sërish detyren e Kryeministrit të Kosovës, Albin Kurti ka shpalosur disa nga zotimet kryesore të qeverisë së ardhshme, duke theksuar se prioritet do të jenë rritja e pagave, pensioneve dhe mbështetja sociale, si dhe investimet kapitale në projekte strategjike.
“Do të rrisim pagat, pensionet dhe ndihmën sociale. Do të shënojmë rekorde të reja në investime kapitale, me synimin që ato të kalojnë 1 miliard euro në vit,” deklaroi Kurti.
Një nga propozimet më të veçanta është skema e re për mbështetjen e gjyshërve pensionistë, të cilët kujdesen për nipërit dhe mbesat kur të dy prindërit punojnë.
“Çdo gjyshe apo gjysh që kujdeset për fëmijë të moshës 13 deri në 36 muaj do të përfitojë 100 euro shtesë në muaj, përveç pensionit bazë,” bëri të ditur Kurti.
Rritje e pagës minimale mbi 500 euro
Në fushën ekonomike, Kurti premtoi se gjatë mandatit të ardhshëm paga minimale do të rritet mbi 500 euro dhe nuk do të tatohet, duke synuar përmirësim të standardit të jetesës dhe fuqizim të konsumit të brendshëm.
Ai përmendi gjithashtu se një fokus i veçantë do t’i kushtohet hapjes së vendeve të reja të punës, përmes projekteve infrastrukturore dhe nxitjes së sektorëve strategjikë.
gijotina.com/
Discussion about this post