Gjykata Themelore në Prishtinë ka marrë vendimin për të vazhduar edhe për dy muaj të tjerë masën e paraburgimit ndaj Naim Murselit, Kushtrim Kokallës dhe Granit Plavës, të cilët dyshohen për vrasjen e Liridona Ademajt.
Lajmin për “Betimi për Drejtësi”, e ka konfirmuar bashkëpunëtorja profesionale nga zyra e kryetares së kësaj gjykate, Medina Gashi.
“Ju informoj se të pandehurve N.M, G.P dhe K.K iu është vazhduar masa e paraburgimit për dy muaj me Aktvendimin e datës 23.08.2024, e cila masë do t’iu llogaritet nga data 26.08.2024 deri me datë 25.10.2024, nën kushtet ligjore të parapara në KPPK”, thuhet në përgjigjen e gjykatës.
Fillimisht, tre të dyshuarve, Gjykata Themelore në Prishtinë më 3 dhjetor 2023, ua kishte caktuar masën e paraburgimit në kohëzgjatje prej 30 ditësh, të cilin vendim e kishte lënë në fuqi edhe Gjykata e Apelit.
Në nëntor të vitit 2023, vendi u trondit nga një vrasje e rëndë që ndodhi në Prishtinë, ku viktima ishte një grua e cila më pas u identifikua që ishte Liridona Murseli-Ademaj.
30 vjeçarja u vra derisa ishte në veturë me bashkëshortin e saj, Naim Murseli, i cili më pas rezultoi se ai ishte i përfshirë në vrasjen e saj, duke ngritur kurth për të dhe duke paguar njerëz për ta vrarë Liridona Ademaj, gruan e tij.
Nëntë muaj pas vrasjes, Prokuroria Themelore ende nuk ka ngritur aktakuzë për Naim Murselin, dhe dy të dyshuarit tjerë, të cilët janë duke u mbajtur në paraburgim që nga koha kur ka ndodhur vrasja.
Tre të dyshuarit po mbahen në paraburgim në Burgun e Sigurisë së Lartë.
Vrasja e Liridona Ademaj nxiti reagime të ashpra në shoqëri.
Discussion about this post