Prokuroria e Posaçme Kundër Korrupsionit ka vendosur të anulojë tenderin për blerjen e pajisjeve të spiunazhit për agjentët në terren e Byrosë Kombëtare të Hetimit.
Sipas burimeve të Gijotina.com shkak i anulimit u bë mungesa e Certifikatave të Sigurisë së Personelit nga kompanitë pjesëmarrëse.
Njoftimi i anulimit u bë në faqen e vet zyrtare dhe në Agjencinë Prokurimeve Publike. Bëhet fjalë për procedurën “Tender i Kufizuar mbi kufirin e lartë monetar”.
Tenderi është ishte thirrur më 12 dhjetor 2023, kishte objekt të kontratës: “Blerje sisteme/pajisje të teknikës operative” Loti i Dytë. “Blerje Sistem Teknologjik Hardware dhe Software për suportin e hetuesve në terren”. Fondi limit për këtë pjesë të tenderit është 32 136 667 lekë (pa TVSH) ose 307,675 (treqind e shtatë mijë e gjashtëqind e shtatëdhjetë e pesë) euro pa TVSH.
Zyrtarisht arsyet e anulimit bazohen në Ligjin Nr. 36/2020 “Për prokurimet në fushën e mbrojtjes dhe të sigurisë”, neni 36, pika
1:c) nëse asnjë nga ofertat e paraqitura nuk përputhet me kriteret e caktuara në dokumentet e tenderit.
Ndërkaq, Prokuroria e Posaçme kundër Korrupsionit dhe Krimit të Organizuar nuk ka njoftuar një datë të re, por deklarohet se “do të merren të gjitha masat e nevojshme për rihedhjen e procedurës së klasifikuar të prokurimit.
Duhet CSP “Sekret”
Sipas aneksit të kontratës së prokurimit, në pjesën e kritereve përcaktohet se, jo vetëm që kompania duhet të jetë e kredituar në fushën e sigurisë, por personeli i tyre duhet të jetë i besuar.
“Operatorët ekonomikë të interesuar duhet të jenë të pajisur me Certifikatën e Sigurimit Industrial (CSI),
e cila duhet të jetë: Jo më e ulët se niveli i klasifikimit “Sekret”;
E vlefshme në momentin e prokurimit dhe të lidhjes së kontratës së klasifikuar; Në përputhje me objektin specifik të prokurimit të klasifikuar”, nënvizohet në kontratë.
Në funksion të hartimit të ofertës dhe në kushtet kur ky proces kërkon akses tek informacioni i klasifikuar që administrohet nga SPAK, operatorët ekonomikë duhet të paraqesin :
Dokumente/vërtetime të lëshuara nga Autoriteti Kombëtar i Sigurimit të Informacionit të Klasifikuar ose CSI të lëshuar në emër të ofertuesit, ku të evidentohet personeli i pajisur me CSP: Administratori i shoqërisë; Oficeri i Sigurisë Industriale dhe zëvendësi i tij (nëse ka zëvendës); 2 inxhinierë IT/Elektronikë/Telekomunikacion që do të angazhohen në ekzekutimin e kontratës;
CSP duhet të jetë: Jo më e ulët se niveli i klasifikimit “Sekret”;
E vlefshme në momentin e prokurimit dhe të lidhjes së kontratës së klasifikuar; Në përputhje me objektin specifik të prokurimit të klasifikuar.
Punonjësit e besuar do të kenë akses në informacionin e klasifikuar lidhur me specifikimet teknike të objektit të prokurimit. Gjithashtu kontraktori do të bëjë instalimin, integrimin, konfigurimin e sistemit dhe trajnimin e personelit në funksion të përdorimit me efikasitet të tij.
Denoncohet super tenderi 2 miliardë lekë
Prokuroria e Posaçme po përgatitet seriozisht për ‘luftë’ kundër korrupsionit, pasi do të shpenzojë 2 miliardë lekë për dronët dhe disa pajisje vëzhgimi dhe përgjimi.
Ky është një projekt të cilin SPAK e ka ndarë në tre lote, sepse parashikon të blejë disa pajisje të natyrave të ndryshme. Por, menjëherë ka pasur përplasje për lotin tre me objekt “Blerje Sistem Anti – Dron autonom i palëvizshëm” me fond limit 24,066,667 lekë pa TVSH ose 230, 413 euro (pa TVSH). Pra 240 milionë lekë do të shpenzohen për anti dronë.
Më datë 22 janar 2024, firma SINTEZA CO ka bërë një ankesë në KPP, ku kundërshton vendimin e SPAK mbi finalizimin e këtij tenderi. Se për çfarë ankohet firma në fjalë do ta raportojmë më vonë, sepse KPP për momentin ka menduar të mbajë “të fshehtë” dokumentin, ose do ta publikojë në një moment tjetër. Por, kjo shton edhe më shumë dyshimet që kemi të bëjmë me një manipulim në kriteret e tenderit.
Nuk presim që KPP të korrigjojë vendimin e SPAK, por shqyrtimi në këtë shkallë administrative na ndihmon të shohim ç’po ndodh me prokurimin.
Për një lot tjetër të tenderit është bërë denoncim i ri. Konkretisht, më datën 17.10.2023 në Sistemin e Prokurimeve Elektronike është publikuar procedura e prokurimit “Procedurë e Hapur mbi Kufirin e Lartë Monetar” me nr. REF-83878-10-16-2023 3 me objekt: “Blerje pajisje dhe sisteme elektronike”, me fond limit 850 milionë lekë.
Denoncimi është bërë për ‘Loti i Pestë me nr. REF-83892-10-16-2023, me objekt: “Blerje server”, me fond limit 210 milionë lekë pa TVSH, zhvilluar me datë 16.11.2023 nga autoriteti kontraktor, Prokuroria e Posaçme Kundër Korrupsionit dhe Krimit të Organizuar.
Edhe me fakte nga tenderi, edhe në shpjegimin e tij ankimuesi “COMMUNICATION PROGRESS” SHPK tregon se si SPAK i ka dhënë pa garë tenderin kompanisë që paraqiti ofertën më të shtrenjtë.
Në dokumentin më sipër shohim se kjo firmë ka paraqitur ofertën me vlerë 203 milionë lekë, pra sa 97% e fondit limit dhe më të lartë se firmat e tjera. Kështu SPAK ka kryer edhe një tjetër shkelje ligjore, duke cenuar konkurrencën dhe duke shfrytëzuar pa kriter fondet që paguhen nga taksat e qytetarëve.
Ankimuesi “Communciation Progress” shpk shprehet se i gjithë ky rezultat ka ardhur për shkak të kritereve diskriminuese dhe të hartuara nga SPAK që t’i përshtaten vetëm një operatori. Prandaj denoncuesi kërkon që të shfuqizohet vlerësimi i komisionit, i cili ka skualifikuar pa arsye ligjore ofertat më të lira dhe të rishikohen edhe njëherë të gjitha ofertat.
Theksojmë se vetë “Communciation Progress” shpk ka paraqitur një ofertë me vlerë 19% më të ulët se fituesi, që mund të përktheheshin në kursimin e 30 milionë lekëve. Komisioni i drejtuar nga Jonaid Myzyri nuk i dha të drejtë kompanisë ankuese, megjithatë SPAK ka reflektuar duke anuluar pjesërisht super tenderin.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post