Kryeministri Edi Rama u pyet sot nga gazetarët në lidhje me akuza që janë hedhur se, ai ka bërë një marrëveshje me Lulzim Bashën, për të ndihmuar këtë të fundit të qëndroj në krye të Partisë Demokratike. Rama tha se, kjo është një nga shumë gënjeshtrat që po qarkullojnë sot në vend nga zëra që nuk i duan të mirën vendit.
Sakaq, ai theksoi që nuk mund të bëjë një bashkëpunim më Bashën për diçka të tillë, kur mendon që kryedemokrati po e çon drejt fundit partinë e tij. “Gënjeshtër fund e krye. Gënjeshtër pa bravë farë fare. Ka plot e plot gjëra. Gënjeshtra gjen më shumë veshë. Populli nuk e ka thënë fjalën që kur gënjeshtra ka bërë xhiron e botës, e vërteta s’ka veshur ende pantallonat. Për t’u kthyer te Lulzim Basha! Basha është një nga dy anët e një marrëzie që po e çon PD drejt një fundi të merituar për shkak se është një fund i përgatitur me vite. Jo nga unë, as nga ne, as nga ju, as nga ata shqiptarë që e besojnë dhe e votojnë, e mbështesin, PD dhe që s’kanë përfituar fare nga ajo. Por si tifozë të një skuadre futbolli s’i ndahen skuadrës së tyre, edhe kur nuk fiton. Por nga këto dy figura që janë shëmbëlltyra e gjithë asaj që është përgatitur me këmbënguljen e verbër dhe përsëritjen të së njëjtës gjë, në kërkim të rezultateve të tjera”, tha Rama, duke bërë me dije se ai dhe asnjë anëtar i qeverisë nuk ka lidhjen më të vogël me situatën brenda PD-së.
Discussion about this post