Gijotina.com ka siguruar pamje nga vendngjarja ku ndodhi atentati ndaj 33-vjeçarit Indrit Saledini, një ditë më parë. Sipas pamjeve pranë garazhit të pallatit ku objektivi i atentatit jetonte, dallohet shembja e bordurës anësore, duke lënë të kuptohet se shpërthimi ka qenë i fortë. Sipas burimeve lënda plasëse e llojit tritol ka qenë rreth 400 gram. Atentatori i cili ka vënë lëndën plasëse në rrugën ku 33-vjeçari do të përshkruante është shfaqur në vendngjarje 15 minuta para shpërthimit. Sipas pamjeve të siguruara nga kamerat në zonë, ai ka pasur një kapuç në kokë dhe ka tentuar të fshehë fytyrën duke mbajtur një karton. Eksplozivi mësohet se ka qenë i telekomanduar duke bërë që atentatorët ta shpërthejnë atë nga distanca. Pas shpërthimit atentatori mësohet se është larguar qetësisht në këmbë nga zona ku ndodhej.
33-vjeçari Indrit Sadedini raportohet se lëvizte me automjet të blinduar, ndaj atentatorët kanë zgjedhur që lëndën plasëse ta vënë në garazhin e makinës duke u siguruar se ai do të përshkruante rrugën në këmbë. Sadedini po merr ndihmë mjekësore në spitalin e Traumës në Tiranë, teksa mësohet se ka dëmtuar rëndë të dyja këmbët. Sipas informacioneve pista kryesore e hetimeve është ajo e larjes së hesapeve të drogës, ndërsa policia po punon për identifikimin dhe kapjen e autorëve. 33-vjeçari mësohet se nuk është dënuar ndonjëherë, por është proceduar për shkak të përfshirjes në konflikte me disa persona të tjerë. Ndërkohë, sipas burimeve policia po heton të shkuarën e tij gjatë kohës që ka jetuar jashtë vendit.
Discussion about this post