Pandeli Majko merr mandatin e deputetit nga Komisioni Qendror i Zgjedhjeve, duke zëvendësuar mandatin e ndërprerë të Alqi Bllakos, i cili u arrestua për akuzat e korrupsionit dhe shpërdorimit të detyrës në atë që konsiderohet si afera e inceneratorëve. Kujtojmë se SPAK kërkoi nga Kuvendi autorizimin për arrestimin e Bllakos, teksa në datën 30 mars pasdite ai dorëzoi mandatin e deputetit në Kuvend. Në mbrëmje, kryetarja e Kuvendit Lindita Nikolla i dërgoi shkresën kreut të SPAK Arben Kraja, ku e informonte për mbarimin e mandatit të deputetit për Bllakon, çka i hapi rrugë arrestimit të tij.
Bllako akuzohet për shpërdorim detyre dhe korrupsion në lidhje me inceneratorin e Fierit. Sipas akuzës, ai ka përfituar afro 14 milionë e 600 mijë lekë nën dyshimin se ka falsifikuar dokumente për të shpronësuar një tokë për ta kthyer nga një tokë arë në truall. Ai ka bashkëpunuar me ish-ministrin e Mjedisit, Lefter Koka, i cili ndodhet në burg dhe me kryetarin e shpronësimeve në Ministrinë e Mjedisit, Pëllumb Abeshi.
Nga ana tjetër Majko dorëzoi më herët mëngjesin e kësaj të hëne në Komisionin Qendror të Zgjedhjeve formularin e dekriminalizimit. Veterani socialist do të zërë karrigen e Alqi Bllakos të cilit iu vunë pranga me kërkesë të për aferën e Inceneratorit të Fierit. Pandeli Majko u largua nga Kuvendi pas zgjedhjeve parlamentare të 25 Prillit, sepse nuk arriti të grumbullonte votat e nevojshme për të thyer herësin, pasi ishte renditur i 19-ti, jashtë listës së sigurt.
Discussion about this post