Banka Botërore ka publikuar ditën e sotme një raport mbi ecurinë ekonomike të vendit tonë. BB ka evidentuar shumë problematika, por një nga më emergjentet ka renditur rritjen e borxhit publik. Në raport thuhet se vendi ynë ka aktualisht borxhin disa herë më të lartë se mesatarja e borxhit publik në vendet e tjera të Ballkanit Perëndimor.
Për këtë arsye, BB kërkon që të rritet transparenca nga tatimet dhe të mos bëhen me shpenzime pa kriter, duke cekur si problem tjetër të madh keqmnenaxhimin e fondeve. “Forcimi i financave publike. Borxhi publik i Shqipërisë është shumë më i lartë se mesatarja e borxhit në gjashtë vendet e Ballkanit Perëndimor. Për të garantuar qëndrueshmërinë e financave të vendit, ështe e nevojshme që normat e tatimit mbi të ardhurat personale të jenë më të drejta, të rriten të ardhurat nga TVSH-ja dhe të riforcohet besueshmëria e politikës fiskale, veçanërisht nëpërmjet angazhimit të qëndrueshëm politik ndaj rregullave fiskale”, thuhet në raport.
Ndër të tjera, thuhet se punësimi mbetet sërish problem, kjo ka dobësuar mirëqenien e qytetarëve shqiptarë.
“Ky raport ofron një analizë të freskët të sfidave të zhvillimit të Shqipërisë, një përmbledhje të progresit në zbatimin e reformave dhe rekomandimet kyçe të cilat mund ta ndihmojnë Shqipërinë në rrugën drejt një rimëkëmbje ekonomike të qëndrueshme, elastike dhe gjithëpërfshirëse. Në rekomandimet tona ne jemi fokusuar gjithashtu tek veprimet që duhen të ndërmerren në mënyrë që shqiptarët të kenë jetë të shëndetshme dhe produktive dhe më shumë vende pune e punë më të mira”, thuhet ndër të tjera.
Sipas Bankës Botërore, qeverisë shqiptare do t’i duhet të orientojë fuqinë punëtore nga punët me kualifikim të ulët dhe të mesëm drejt atyre me kualifikim të lartë. Kjo kërkon përmirësim të procesit të të mësuarit, reformim të sistemit universitar dhe zhvillim të aftësive që përshtaten më mirë me nevojat e tregut të punës.
Discussion about this post