Nga Foltorja e radhës këtë të hënë para Kryeministrisë, Berisha denoncoi PS se në mbledhjen e Këshillit të Mandateve refuzuan të votonin pro kërkesës së SPAK për heqjen e imunitetit të zv/kryeministres Belinda Balluku.
Në fjalën e tij, Berisha u shpreh se “nuk ka ideal më të lartë e vendim më fisnik se beteja kundër këtij regjimi”, duke e cilësuar qeverinë aktuale si një e keqe që, sipas tij, ka “ngërthyer trupin e Shqipërisë”. Ai vlerësoi protestën e 20 shkurtit 2026 si “kryengritjen paqësore më të fuqishme” që vendi ka njohur pas 20 shkurtit 1991.
Sipas kreut të PD-së, 20 shkurti 2026 ishte “dita e triumfit të idealeve demokratike, e guximit qytetar dhe e përgjegjësisë ndaj vendit”, duke shtuar se në atë ditë “Tirana ishte në duart e qytetarëve”. Ai akuzoi qeverinë si “organizatë kriminale”, duke pretenduar se për veprimet e saj meriton dënime të rënda.
Berisha iu referua edhe mbledhjes së Këshillit të Mandateve, duke përmendur Ulsi Manjën, për të cilin tha se ka deklaruar se Belinda Balluku “nuk ka kryer ndonjë krim aq të rëndë sa të arrestohet”. Në kundërpërgjigje, Berisha pretendoi se ndaj saj rëndojnë nëntë vepra penale, të cilat sipas tij përbëjnë minimumi 36 vite burg.
Ai shtoi se, sipas vlerësimit të tij, këto nëntë akuza përfaqësojnë vetëm një pjesë të vogël të shkeljeve që, sipas tij, janë kryer nga përfaqësues të qeverisë.
Ai lajmëroi se ditën e shtunë, 28 shkurt, qytetarët do të protestojnë për arrestimin e Ramës dhe Ballukut, pasi vetëm qytetarët do ta rrëzojnë qeverinë.
Discussion about this post