Skuadra e Partizanit ka gjetur vazhdimësinë. Pas startit të dobët në kampionat, kryeqytetasit fituan me Besëlidhjen në kupë dhe më pas ndaj Kastriotit në kampionat. Ditën e sotme të kuqtë kanë koleksionuar fitoren e radhës por këtë herë suksesi erdhi në një miqësorë. Partizani mundi me shifrat e thella 4-0 skuadrën e Turbinës.
Mala kaloi në avantazh skuadrën e drejtuar nga trajneri Ilir Daja në startin e takimit me një penallti. Fatet e takimit u mbyllën në minutën e 19 me autor sulmuesin Filipoviç i cili gjeti rrugën e rrjetës pas shumë ndeshjesh “thatësirë”. Partizani nuk u ndal me kaq pasi realizoi edhe dy gola të tjerë në pjesën e parë. Në të 32 minutë Liço shënoi edhe golin e tretë për Partizanin përpara se Mala shënoi edhe golin e dytë personal. Në fraksionin e dytë nuk pati ndryshim rezultati, Partizani administroi lojën teksa trajneri Ilir Daja aktivizoi shumë futbollistë të rinj teksa mori sinjale pozitive.
Discussion about this post