Gjykata Kushtetuese ka mbetur me 8 anëtarë, por duket se jo edhe për shumë kohë. Kuvendi i Shqipërisë ka hapur procedurën për plotësimin e vendit vakant që la Elsa Toska pas dorëheqjes së saj pak ditë më parë. Sipas njoftimit të Parlamentit, aplikimet duhet të dorezohen deri në datën 28 Tetor 2024. Madje, janë nxjerrë edhe kriterët që duhet të plotësojnë kandidatët.
Njoftimi i Kuvendit të Shqipërisë:
Kuvendi i Republikës së Shqipërisë, pasi u njoh me vendimin nr. 62, datë 23.09.2024, të Gjykatës Kushtetuese, për mbarimin përpara afatit të mandatit të gjyqtares së Gjykatës Kushtetuese, znj. Elsa Toska, bazuar në nenet 125, 127, pika 1, shkronja “c” dhe pika 3, të Kushtetutës së Republikës së Shqipërisë, si dhe nenet 7, pika 1, 7/c dhe 8, pika 3, të ligjit nr. 8577, datë 10.2.2000 “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar. Shpall hapjen e procedurës së aplikimit për vendin vakant, mandat plotësues, për 1(një) anëtar të Gjykatës Kushtetuese, me qëllim plotësimin e vakancës të krijuar për shkak të deklarimit të mbarimit përpara afatit të mandatit të gjyqtares Znj. Elsa Toska, i cili përfundon më datën 14.11.2028, referuar Vendimit të Kuvendit nr. 133/2019 “ Për zgjedhjen e zonjës Elsa Toska, anëtare të Gjykatës Kushtetuese”.
Dy javë më parë, Elsa Toska njoftoi zyrtarisht dorëheqjen nga posti i saj, duke cituar “arsye personale”, por nuk dha detaje të tjera. Pas dorëheqjes, trupa e Gjykatës Kushtetuese shpalli vakancën dhe njoftoi organin e emërtesës, që në këtë rast është Kuvendit, për vijimin me procedurat për zëvendësimin e Toskës. Zëvendësimi i saj vjen në një kohë “të vështirë” për Kuvendin pasi opozita ka paralajmëruar se nuk do të ketë marrëdhënie normale institucionale me institucionet dhe maxhorancën. Çështja qëndron në faktin se pasardhësi i Toskës duhet të zgjidhet me shumicë të cilësuar votash nga 140 deputetët e Kuvendit. Pra, minimalisht duhen jo më pak se 84 deputetë. Me shumë gjasa, zgjedhja e emrit që do të zëvendësojë Toskën do të mbetet pezull për disa kohë, derisa të ketë një urë dialogu mes maxhorancës dhe opozitës.
Discussion about this post