Pas dy shtyrjeve për shkak të pandemisë me koronavirus, sot në Kosovë fillon viti i ri shkollor.
Ministrja e Arsimit Arbërie Nagavci ka bërë të ditur se janë bërë përgatitjet e duhura për të filluar vitin e ri shkollor dhe se mbi 90% e mësimdhënësve dhe stafit tjetër që punon në shkolla janë vaksinuar.
Ministria e Arsimit, Shkencës, Teknologjisë dhe Inovacionit ka hartuar udhëzuesin për organizimin e procesit mësimor në kushte të pandemisë COVID-19, i cili parasheh 4 skenarë për zhvillimin e procesit mësimor, varësisht nga situata epidemiologjike dhe kushtet specifike në shkolla.
Megjithëse skenari më i preferuar është ai për rikthim në shkolla me prani fizike, në rast se në ndonjë shkollë situata epidemiogjike është më e rënduar, task-forcat në nivel komune mund të marrin vendim për të kaluar në ndonjë nga skenarët tjerë.
Përveç mësimit me prezencë janë bërë edhe përgatitjet për organizimin e mësimit online, në rast nevoje.
Ministri i Arsimit Ramë Likaj tha se Qeveria e Kosovës ka ndarë gjysmë milioni maska në dy ditët e fundit të cilat janë ndarë proporcionalisht për secilën komunë dhe shkollë për nxënësit dhe për arsimtarët, “ndërsa kontingjenti i maskave do të vazhdojë edhe më tej sipas nevojës”.
Sipas ministrit, në fillim, statistikat treguan se 30 për qind e fëmijëve nuk kanë kushte për të ndjekur mësime-online, ndërsa tani gjendja është përmirësuar dhe më pak se 10 për qind e fëmijëve nuk kanë kushte.
Kosova ka mbyllur institucionet arsimore në muajin mars, kur u paraqiten edhe rastet e para me koronavirus. Mësimi më pas është zhvilluar deri në përfundim të vitit shkollor përmes platformave online dhe mësimeve të transmetuara në televizionin publik.
