El Clasico, mes Barcelonës dhe Real Madridit, zhvillohet në Kaunas, vendi organizator i Final-Four të Euroleague Basketball 2023.
Dy superfuqitë e basketbollit spanjoll takohen në gjysmëfinale të kompeticionit elitar evropian të basketbollit, me Barcelonën që kësaj radhe është favorit, si rrjedhojë e renditjes gjatë sezonit të rregullt.
Ekipi “Blaugrana” ishte më e mirë se Zalgiris i Lituanisë në fazën çerekfinale, ndërsa Reali mundi Partizanin e Beogradit pas një sherri masiv në Madrid, që ndryshoi rrjedhën e të gjithë serisë.
“Los Blancos”, udhëtuan drejt Gadishullit Ballkanik, me disavantazhin e 2 ndeshjeve. Në Beograd, mikpritja ishte inekzistente, me tifozët serbë që kërcënuan me jetë, basketbollistët e klubit mbretëror.
Presioni psikologjik, nuk bëri punë, sepse Reali i Madridit, triumfoi në të dy takimet e luajtura në kryeqytetin e Serbisë, duke “detyruar” klubin e ish-ushtrisë jugosllave, që të rikthehej në Spanjë për ndeshjen e pestë.
Në ndeshjen e fundit, spektakli nuk mungoi, me Partizanin që i shkoi pranë, kualifikimit, por kësaj radhe, Reali i Madridit kopjoi kolegët e tyre në futboll, duke kthyer rezultatin atëherë kur nuk pritej e duke siguruar kështu biletën për në Final-Four.
Sonte, në orën 20:00, do të jetë një tjetër histori, me “Blancos” e “Blaugrana” që, në një ndeshje teke, do kërkojnë të fitojnë biletën drejt finales së madhe, ku do të ndeshen me fituesen e takimit Olympiacos-Monaco./m.b /gijotina.com
Discussion about this post