Pas Enkelejd Alibeajt dhe Damian Gjiknurit, burime bëjnë me dije se përfaqësuesit e OSBE do të takohen këtë të mërkurë me kreun e grupit parlamentar demokrat, Gazment Bardhi.
Takimi pritet të zhvillohet në orën 14:00 në ambientet e Kryesisë së Kuvendit.
Kryetarja në Detyrë të Prezencës së OSBE-së në Shqipëri, Clarisse Pasztory, pritet tw diskutojw gjatw kwtij takimi me Bardhin mbi procesin e Reformës Zgjedhore.
Në nisje të sesionit të ri parlamentar debati për Reformën Zgjedhore duket se është shndërruar në krye-temë e debatit politik në vend.
Komisioni i Posaçëm i Reformës Zgjedhore pritet të mblidhet ditën e premte, 19 janar, në orën 11:00, pas dakordësisë së arritur mes palëve.
Mbledhja e komisionit vjen pas takimit të patur mes përfaqësuesve të OSBE dhe bashkëkryetarit socialist të komisionit të posaçëm, Damian Gjiknuri.
Gjiknuri bëri me dije se në takim u diskutua në lidhje rifillimin e punës së komisionit për reformën zgjedhore. Sipas deputetit socialist, synim i punimeve të këtij komisioni mbeten rekomandimet e OSBE-ODHIR, si dhe vendimet e Gjykatës Kushtetuese.
Përfaqësuesit e OSBE u takuan dhe me bashkëkryetarin e opozitës Enkelejd Alibeaj, i cili në përfundim të takimit theksoi se “Reforma Zgjedhore përbën prioritetin kryesor i cili duhet të jetë gjithëpërfshirës dhe transparent për shqiptarët, në mënyrë që t’i garantohet qytetarëve shqiptarë një proces zgjedhor i lirë dhe i drejtë, nëpërmjet listave të hapura, një zonë kombëtare zgjedhore, votim për qytetarët shqiptarë në diasporë dhe proces votimi dhe numërimi elektronik”.
Discussion about this post