Vetëm disa ditë pas dorëheqjes së Lulzim Bashës si kryetar i PD, kanë nisur ndryshimet e para në selinë blu. Gijotina.com mëson se disa muaj pasi u vendosën me urdhër të Bashës, po hiqen dyert e blinduara në PD.
Teknikët kanë filluar heqjen e dyerve të hekurit, të cilat u vendosën më datë 6 janar, vetëm dy ditë para protestës së 8 janarit të njoftuar nga Sali Berisha, i cili tentoi të marrë godinën me mbështetësit e tij.
Blindimi i PD-së me dyer çeliku ishte bërë temë diskutimi dhe debati më i fundit ishte ditën e djeshme gjatë mbledhjes së Kryesisë, ku një pjesë e deputetëve kërkuan fillimisht heqjen e dyerve të blinduara me qëllim dhënien e një mesazhi pozitiv për ribashkimin e partisë.
Ndonëse Basha e mohonte në mënyrë kategorike blindimin e selisë duke thënë se po kryhen punime brenda godinës, pamjet që qarkulluan në media e nxorën blof.
Kujtojmë se, PD ka filluar të diskutojë për ribashkimin mes deputetëve që mbështetën Bashën dhe atyre që mbështetën Berishën duke krijuar edhe një grup negociator më Dashnor Sulën, Alfred Rushajn dhe Ferdidnad Xhaferrajn për të arrirë bashkimin.
Discussion about this post