Lufta mes Armenisë dhe Azerbajxhanit ka rifilluar një vit pas shpalljes së armëpushimit me ndërmjetësimin e Rusisë pasi azerët rimorën kontrollin në rajonin e Nagorno Karabakhut.
Ministria e Mbrojtjes së Armenisë me anë të një postimi në Twitter ka njoftuar se Azerbajxhani ka nisur betejën me Armeninë duke shkaktuar ushtarë të vrarë dhe të plagosur.
“Konfirmohet humbja e jetës së dy ushtarëve, ndërsa po vijon puna për të verifikuar edhe informacionet për dëme të tjera të pësuara. Kemi humbur dy pozicione ushtarake deri më tani. Për shkak të reagimeve tona u kemi shkaktuar dëme të mëdha armikut”, shkruan Ministria e Mbrojtjes.
Nga ana tjetër, Armenia i ka kërkuar Rusisë të ndihmojë në mbrojtjen e sovranitetit të saj territorial.
“Meqenëse Azerbajxhani ka sulmuar territorin sovran të Armenisë, ne po i kërkojmë Rusisë të mbrojë integritetin territorial të Armenisë bazuar në një marrëveshje ekzistuese të vitit 1987 (mbrojtje reciproke) midis vendeve tona”, tha Armen Grigoryan, sekretari i Këshillit të Sigurimit të Armenisë.
Rusia ka një bazë ushtarake në Armeni si dhe një forcë paqeruajtëse në enklavën e Nagorno-Karabakut ku u shpalos lufta e vitit të kaluar. Deri më tani, nuk ka ende një përgjigje zyrtare nga Rusia.
Discussion about this post