Pak minuta më parë ka përfunduar mbledhja e Këshillit të Lartë të Prokurorisë, ku janë marrë disa vendime, mes tyre plotësimi i disa vakancave. Në njoftimin e publikuar thuhet se, Këshilli vendosi sot caktimin e përkohshëm të drejtuesve të Prokurorisë në Kavajë, Gjirokastër dhe Shkodër. Konkretisht, është përcaktuar për një periudhë tremujore Durim Bedinin, në pozicionin e drejtuesit të Prokurorisë pranë Gjykatës së Shkallës së Parë Kavajë, Julian Çafka, në pozicionin e drejtuesit të Prokurorisë pranë Gjykatës së Shkallës së Parë Gjirokastër dhe Lazër Çardaku, në pozicionin e drejtuesit në Prokurorinë pranë Gjykatës së Apelit Shkodër.
Me vendim unanim, Këshilli vendosi të deklarojë mbarimin e statusit të magjistratit për Armanda Xhaferrin, prokurore në Prokurorinë pranë Gjykatës së Shkallës së Parë Elbasan dhe për Ermira Tafanin, prokurore në Prokurorinë pranë Gjykatës së Shkallës së Parë Elbasan, për shkak dorëheqjeje.
Gjithashtu, Këshilli vendosi caktimin në detyrën e Prokurorit në Prokurorinë pranë Gjykatës së Shkallës së Parë Durrës të Englantina Shehu, nëpërmjet procedurës së lëvizjes paralele. Në përfundim të procedurës e verifikimit të pasurisë dhe figurës të Ines Dani, kandidate për t’u pranuar në programin e formimit fillestar të Shkollës së Magjistraturës, për vitin akademik 2021-2022, Këshilli vendosi ndalimin e kandidates për t’u pranuar në Programin e Formimit Fillestar të Shkollës së Magjistraturës.
Discussion about this post