Korporata e Investimeve Strategjike e cila lindi në 2019-ën me urdhër të Edi Ramës, është kompani shtetërore e cila menaxhon pronat e shtetit nëpërmjet projekteve me interes kombëtar. Korporata është krijuar mes kritikave të Bankës Botërore dhe akuzave nga palët politike pasi sipas opozitës, kjo shoqëri i shërben më shumë vjedhjes së pronave publike dhe private të qytetarëve. Por përpos menaxhimit të pronave të qytetarëve, Korporata që është nën varësinë e ministres Delina Ibrahimaj bën edhe tenderë për mirëmbajtjen e zyrave të saj.
Edhe pse Gijotina.com pothuajse përditë ka ngritur shqetësimin se institucionet publike nuk duan t’ia dinë për krizën ekonomike që ka kapluar vendin dhe qytetarët, procedurat për mobilim zyrash me shifra të larta vijojnë akoma. Në faqen e Agjencisë së Prokurimeve Publike ka mbërritur një tender të bërë pikërisht nga Korporata e investimeve Shqiptare, për blerje mobiljesh dhe orendish për zyrat e shoqërisë. Tenderi mban numrin e referencës REF-27608-05-05-2022 dhe ka fondin limit prej 3,343,995 lekë të reja, ose rreth 34 milionë lekë të vjetra.
Pra, Delina e Financave që në deklarata publike na tregon se kriza ekonomike do të zgjas dhe do të përkeqësohet, në vend që të gjej zgjidhje se si t’u vijë në ndihmë qytetarëve që po përballen përditë me rritjen e çmimeve, gjen kohë dhe bën tender 34 milionë lekë për të mobiluar zyrat e kompanisë që vjedh pronat e shqiptarëve për t’i çuar te oligarkët dhe njerëzit e qeverisë. Korporata e krijuar nga Rama po funksionon në mënyrën më të mirë për qeveritarët për t’ua nxi jetën shqiptarëve, pasi përveçse u merr pronat, tashmë u merr edhe ca lekë nga buxheti i shtetit për investime që nuk kanë asnjë të mirë publike. Por tashmë jemi mësuar dhe duhen kuptuar punonjësit e Korporatës, sepse të rrish gjithë ditës në karrige për të gjetur se kë prona duhen sekuestruar nuk është e lehtë, ndaj duhen ca kolltuqe që të ndihen më rehat.
Gijotina.com
Discussion about this post