Gjatë vizitës në një nga qendrat shëndetësisë të Tiranës, kryeministri Edi Rama pothuajse e tha nëse ekzistonte mundësia që në Shqipëri vaksinimi do të ishte i detyrueshëm për disa kategori. Mesazhi i tij i drejtohej jo vetëm mësuesve, studentëve, por edhe administratës.
“Patjetër që mund të vijë momenti që për disa kategori të bëhet e detyrueshme edhe këtu. Sepse tjetër gjë është dikush që është në shtëpinë e vet, por kush ka punë që lidhet me njerëz të tjerë nuk mund të thotë s’dua. Nëse nuk do, të tërhiqet nga ndërveprimi me të tjerët për aq kohë sa është virusi vërdallë. Aty ku janë mjedise publike që mblidhen shumë njerëz, ke detyrimin të vaksinohesh për të tjerët”.
Menjëherë pas deklaratës së tij, detyra e parë me të cilën u gdhinë punonjësit e zyrave të burimeve njerëzore në shtet ishte hartimi i listave të njerëzve në administratë; kush e kishte bërë dhe kush jo vaksinën.
Burime nga ministri të ndryshme bëjnë me dije se zyrat e burimeve njerëzore në shtet kanë nisur apelin për tu informuar se kush nga punonjësit e ka marrë vaksinën dhe kush jo, hapi i pare ky drejt kalimit me gjasë në një hap të dytë për ta kthyer me detyrim vaksinimin për këtë kategori sa kohë që mbulesa për këtë sektor mund të jetë e ulët.
Kryeministri Edi Rama paralajmëroi se nëse vaksinimi do të jetë i ulët qeveria mund ta vendoste me detyrim vaksinën për atë kategori, një hap ky i ndjekur në Itali dhe Greqi, aty ku mbulesa e vaksinimit kish çaluar në një përqindje jo të kënaqshme për autoritetet. Nuk po ndiqet e njëjta politikë psh në Spanjë, sa kohë që përqindja e vaksinimit aty është tepër e lartë 73-78% dhe deri në muajin dhjetor spanjollet parashikohet të vaksinohen në masën 90%.
Në Shqipëri mbulesa e vaksinimit me dy doza kap shifrën e 30%-it, duke e renditur vendin tone ndër vendet e fundit në Evropë për vaksinimin edhe pse procesi në vend filloi shumë më herët se vendet e tjera të Evropës.
