Pas vizitës që zhvilloi në Turqi me presidentin Rexhep Tajip Erdogan, presidenti serb Aleksandër Viçiç ka mbrojtur idenë e “Ballkanit të Hapur”. Mediat serbe bëjnë e dije se Vuçiç është shprehur se përfitimet do të jenë të mëdha për të gjitha shtetet dhe për këtë fton edhe Prishtinën të bëhet pjesë e projektit.
“Sigurisht, Serbia do të përfitojë nga nisma “Ballkani i Hapur”, por edhe Shqipëria, Maqedonia e Veriut dhe Mali i Zi, i gjithë rajoni. Dhe nuk ka dyshim që Prishtina nëse do dëshironte të merrte pjesë dhe ata gjithashtu do të kishin një përfitim të madh” – tha Vuçiç.
Ai gjithashtu është shprehur për mediat serbe se Erdogan mbështet dialogun mes Beogradit dhe Prishtinës dhe beson se është e rëndësishme arritja e një kompromisi.
“Presidenti Erdogan ka mbështetur dialogun midis Kosovës dhe Serbisë dhe beson se është e rëndësishme të arrihet një zgjidhje kompromisi. Por ne nuk u fokusam vetem tek Kosova por tek i gjithë rajoni” – shtoi presidenti serb.
Nisma ‘Ballkani i Hapur’ është kundërshtuar nga Kosova, me pretendimin se është një mundësi për Serbinë që të vazhdojë mohimin e vendit të tyre, ndërsa vetë kryeministri Albin Kurti tha në Tiranë pak ditë më parë se bashkëpunimi mes vendeve të rajonit është i mjaftueshëm me “Procesin e Berlinit”, e cila ka “bekimin” nga liderëve të Bashkimit Europian.
