Pas tre orëve presion në kufi, Athina u vulos pasaportat gazetarëve shqiptarë

Ekipet televizive që ishin nisur për të transmetuar aktivitetin që kryeministrit Edi Rama do të zhvillojë me shqiptarët në Selanik, prej tre orësh u mbajtën “peng” në pjesën e palës greke në pikën e kalimit kufitar të Kapshticës.

Sipas raportimeve, doganierët helenë iu mbajtën pasaportat dhe nuk i lejuan të vijonin udhëtimin, duke iu komunikuar se për të bërë të mundur këtë duhej një autorizim nga Ministria e Jashtme greke.

Teksa pritja vijonte, policia greke u propozoi ekipeve që të kalonin gazetarët me makina, por kamerat sipas tyre duhet të qëndronin në kufi deri në një moment të dytë kur të mbërrinte dhe konfirmimi nga Athina.

Saga e bllokadës greke ndaj mediave shqiptare në Kapshticë ka marrë fund rreth orës 17:10, kur doganierët grekë iu kanë kthyer gazetarëve dhe operatorëve pasaportat e vulosura, në mënyrë që të vijojnë udhëtimin drejt Selanikut për të transmetuar takimin.

Ky aktivitet do të zhvillohet nesër në Porto Palace Hotel, duke nisur nga ora 11:00.

gijotina.com/