Në një kohë kur Gazment Bardhi dhe grupimi i deputetëve që e mbështet inicoi një tryezë me Sali Berishën dhe mbështetësit e tij parlamentarë, Lulzim Basha ka menduar të thërrasë mbledhjen e Këshillit të ri Kombëtar, për të zgjedhur ekipin drejtues të partisë që drejton.
Përgjatë ditës së sotme mbështetësit e Lulzim Bashës kanë anatemuar tryezën e thirrur nga Bardhi, por edhe këtë të fundit, të cilit i kanë kujtuar qëndrimet që ka mbajtur në raport me Berishën, pas shpalljes së tij “non grata” nga SHBA dhe akuzat e ndërsjellëta që kanë shkëmbyer.
Një situatë e tensionuar në raportet Basha-Bardhi u pa edhe në seancën e parë parlamentare, atje ku nga grupimi i Lulzim Bashës u depozitua kërkesa sipas të cilës në krye të Grupit Parlamentar demokrat nuk do të ishte Gazment Bardhi, por Lulzim Basha.
Dhe në kuadër të zhvillimeve, Basha ka vendosur të thërrasë ditën e shtunë, më 9 shtator, në orën 11:00 mbledhjen e Këshillit Kombëtar. Sipas njoftimit zyrtar nga PD-ja e Bashës në këtë mbledhje do të zgjidhet struktura drejtuese e Partisë Demokratike.
Në statutin e miratuar në 2 shtator nga Kuvendi Kombëtar i thirrur nga Basha, u vendos që nënkryetarët e PD-së do të zgjidhen nga Këshilli Kombëtar, dhe njëri prej tyre mund të delegohej edhe si Kryetar i Grupit Parlamentar.
Gjithashtu Këshilli do të zgjedhë Kryesinë e re të PD-së, por edhe Sekretariatin, ku pozicioni më i rëndësishëm është ai i Sekretarit të Përgjithshëm që momentalisht mbahet nga Gazment Bardhi.
Me shumë gjasë, pas tryezës së sotme, Basha do të largojë nga PD që drejton Bardhin dhe të gjithë deputetët që sot ishin prezent në një tryezë me Berishën.
Sinjalet u dhanë pak momente pas përfundimit të tryezës nga mbështetës të Lulzim Bashës, që janë emëruar si anëtarë kryesie apo mbajnë funksione në strukturën që njeh atë për kryetar. “Udha e mbarë” ishte togfjalëshi që më së shumti është përdorur në drejtim të Gazment Bardhit dhe mbështetësve të tij, të cilët nuk njohin Bashën për kryetar, madje nuk njohin asnjë vendimmarrje, përfshi edhe ndryshimet statutore që miratoi Kuvendi i 2 shtatorit.
Të gjithë palët në PD i janë drejtuar Gjykatës, ku janë depozituar vendime, lista, emra, kërkesa, ndërsa duket se me mbledhjen e mbajtur sot, duket se ka një ndryshim raportesh mes grupimit Berisha dhe Bardhi, të paktën sa i takon grupimit parlamentar. Momentalisht ky grupim përbëhet nga 43 deputetë, përfshi këtu edhe ligjvënës të partive aleate të PD-së, ndërsa Lulzim Basha numëron mbështetjen e 10 deputetëve.
Discussion about this post