Mjeku Edmond Gashi është proceduar në gjendje të lirë për thyerje të masës së sigurisë “arrest në shtëpi”, caktuar nga Gjykata e Tiranës për “Shpërdorim detyre”.
Procedimi i tij është bërë mbrëmjen e së enjtes, rreth orës 21:00, nga efektivë të komisariatit nr.6, Sipas burimeve, policia kishte marrë informacioneve në rrugë operative se ai kishte thyer arrestin shtëpiak pas seancës gjyqësore dhe ishte duke frekuentuar ambientet e një lokali në fshatin Kus, në Kashar.
Fillimisht uniformat blu shkuan në ambientet e lokalit, por mjeku Gashi nuk u gjet aty, por në banesën e tij në rrugën “Gelopsi”, në kryeqytet. Por pas këqyrjes së kamera të sigurisë së lokalit është zbuluar me Gashi kishte qenë në ato ambiente, në një kohë që duhet të ndodhej në banesën e tij.
Mbrëmjen e së enjten, ai u shoqërua në ambientet e komisariatit nr 6, por prokurori i çështjes, Bledar Valikaj vendosi që Gashi të procedohet në gjendje të lirë për thyerje të masës së sigurisë dhe jo të arrestohej, ndryshe nga sa ndodh me raste të tjera të ngjashme.
Gashi është një nga mjeket e pezulluar pas skandalit në spitalin Onkologji, dhe në dosjen e Prokurorisë së Tiranës konsiderohet si protagonisti i skemës skandaloze të përfitimit, në kurriz të pacientëve me kancer.
Prokuroria e Tiranës zbuloi se pacientëve me sëmundje tumorale nuk u ofrohej shërbimi, dhe përmes disa mjekëve dhe stafit të përfshirë, orientoheshin në klinikën e onkologut Edmond Gashi.
Ndërkohë ndaj doktorit 47-vjeçar është ngritur akuza për veprën penale “Largimi i të burgosurit nga vendi i qëndrimit”. Mjeku akuzohet se shkelur masën e sigurisë “Arrest në shtëpi”, duke dalë jashtë banesës,
Gjithashtu, e ka pësuar edhe një 22 vjeçar me iniciale E. S., i cili ka fshehur DVR-në me pamjet filmike nga lokali ku ka qëndruar mjeku Edmond Gashi.
“Specialistët për Hetimin e Krimeve të Komisariatit të Policisë Nr. 6 kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për shtetasin E. G., 47 vjeç, banues në Tiranë, për veprën penale ‘Largimi i të burgosurit nga vendi i qëndrimit’, dhe për shtetasin E. S., 22 vjeç, banues në Tiranë, për veprën penale ‘Veprime që pengojnë zbulimin e së vërtetës’. Shtetasi E. G. ka thyer shkelur masën e sigurisë ‘Arrest në shtëpi’, duke dalë jashtë banesës, ndërsa shtetasi E. S. ka fshehur DVR-në me pamjet filmike nga lokali ku ka qëndruar shtetasi E.G“, njoftoi policia e Tiranës lidhur me rastin.
Discussion about this post