Bashkëpunëtorët e ish-biznesmenit famëkeq Rezart Taçi që u zbuluan nga skema e pastrimit të parave nga Shqipëria, kanë zgjedhur të kyçin gojën para prokurorisë duke shmangur kështu edhe hetimet.
Sipas burimeve të fundit lidhur me këtë çështje, sipërmarrësi 90-vjeçar Francesco Zummo nuk ka pranuar t’i përgjigjet asnjë prej pyetjeve të prokurorit Alfredo Motalto, lidhur me skemën e korrupsionit, ku u zbulua edhe emri i tij.
Teksa ka zgjedhur të heshtë para organit të akuzës, Zummo e ka lënë këtë çështje në duart e avokatëve të tij mbrojtës.
Sakaq, një tjetër person i dyshuar për përfshirje në këtë rast të rëndë korruptiv, kontabilisti abio Petruzzella, personi i kontaktit të Rezart Taçit, ka hedhur poshtë akuzat e anti-mafias duke i konsideruar si “thashetheme”, dhe të pa faktuara.
Gjatë marrjes në pyetje, kontabilisti e ka cilësuar punën e tij në transfertën e parave, si të ligjshme. Ai vuri në dukje faktin se lëvizja e parave kishte ndodhur në kohën kur pasuritë e Zummo-s ishin liruar nga masat parandaluese e autoriteteve italiane.
Kujtojmë se nën akuzën e organizatës kriminale dhe pastrimit të parave, në Shqipëri është arrestuar kunati dhe ish-truproja i Rezart Taçit, kurse ky i fundit, vijon të jenë në kërkim ndërkombëtarë nga Prokuroria e Posaçme.
Ish-biznesmeni shqiptar i naftës akuzohet për pastrim parash, grup i strukturuar kriminal. Ai dyshohet se nëpërmjet njohjeve të tij, kishte marrë përsipër pastrimin e parave të mafias Cosa Nostra.
Discussion about this post