Ogerta Manastirliu është shkarkuar nga posti si ministre e Shëndetësisë, por ndërkohë ka vazhduar ditët e fundit pazaret me tenderët. Para se të largohet nga zyra, Manastirliu ka firmosur disa afera me vlera të majme. Njëra nga këto është prokurimi me objekt “Blerje sete kirurgjikale për shërbimet mjekësore” për Spitalin Memorial Fier, për të cilin janë vënë në dispozicion 600 milionë lekë.
Gara është mbyllur në gusht të këtij viti, ndërsa kontrata me fituesin është nënshkruar më datë 1 shtator 2023. Duhet të përmendim përfituesin, sepse tenderi u dha pa garë në shkelje të ligjit për prokurimet.
Në dokument shohim që për këtë tender kanë aplikuar dy kompani, por si për çudi oferta OE “Biometric Albania” ishte në “zero” lekë, çka e bën automatikisht të pavlefshme.
Ndërsa O.E.S DISTRIMED SHPK kishte paraqitur ofertën me vlerë 600 milionë lekë, pra në të njëjtën vlerë si fondi limit.
Duke qenë se kemi vetëm një ofertë dhe me vlerë shumë të lartë Ogerta Manastirliu duhej të kishte urdhëruar që Spitali Memorial Fier të mos vazhdonte me këtë procedurë, duke shpallur anulimin. Ministrja ka shkelur ligjin duke aprovuar këtë prokurim dhe për këtë monitoruesi Open Data Albania i ka vendosur “Flamurin e kuq”. Kështu Orjada Jaho dhe Ermal Rizaj xhiruan në llogarinë e tyre 600 milionë lekë për një shërbim që me siguri as nuk do të lodhen ta japin.
Gijotina.com ka denoncuar shpesh herë tenderët e luksit pa garë që zhvillohen për Spitalin Memorial Fier dhe institucionet përgjegjëse vazhdojnë të heshtin.
Në këtë tender tregohet se do të merren materiale vërtetë të nevojshme mjekësore dhe jo dhoma me qira e transport për mjekët turq. Por, gjithsesi fakti që ky prokurim është zhvilluar në shkelje të ligjit le shumë për të dyshuar nëse kontrata do të realizohet siç duhet, pa përmendur se oferta është shumë e shtrenjtë.
Në këtë spital nuk mund të kryhen të gjitha shërbimit apo analizat e nevojshme për qytetarët. Këto mungesa janë denoncuar disa herë, por Manastirliu ka qenë e zënë me tenderët për hotele me 5 yje dhe ushqimin e zgjedhur mjekëve turq.
Lexo edhe: Janis Karathano ul ekzaminimet, Manastirliu ia ngre në 1.85 mld lekë financimin
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post