PD forcë e parë në Kavajë, reagon më i votuari i primareve, Kadiu: Përballë çdo vështirësie, triumfon vullneti i demokratëve për ndryshim

Hysen Kadiu ka reaguar pas shpalljes së rezultatit të zgjedhjeve në Kavajë.

Ai u shpall më i votuari i primareve në qarkun Tiranë, por u la jashtë listës së mbyllur të PD.

Pas kësaj ai vendosi të lejë garën.

“Kavaja tregoi edhe një herë se, përballë çdo vështirësie, triumfon dëshira dhe vullneti i demokratëve për ndryshim”, shprehet Kadiu në një postim në rrjetet sociale.

“Përballë çdo padrejtësie të kundërshtarit dhe jo vetëm, kavajasit vulosën me votën e tyre fitoren e PD-së. Puna dhe angazhimi i demokratëve të Kavajës dëshmuan se, përballë vështirësive të regjimit dhe lojërave meskine të atyre që u dhurohen vende në listën e sigurt, fitimtarë dalin ata që punojnë me seriozitet dhe përkushtim, pa u përfshirë në lojërat e pushtetit dhe duke u përqendruar te nevoja që kanë qytetarët për ndryshim. Krenar për Kavajën dhe qytetarët e saj, ata që treguan sot e gjithmonë se demokracia triumfon në qytetin ku nisi lëvizja për ndryshimin e madh të viteve ’90. Një dëshirë dhe vullnet që nuk e ndal dot askush”, ka shkruar Kadiu.