Koordinatori i rajonit të Tiranës në Partinë Demokratike, Klevis Balliu u shpreh sot se “vendosja e Dumanit në krye të drejtësisë është qartazi pjesë e axhendës politike të Edi Ramës për të goditur kundërshtarët politikë dhe për të kapur drejtësinë”.
Duke iu referuar publikimeve në një emision investigativ, Balliu u shpreh se “rasti i Altin Dumanit, i cili kaloi Vetingun pa deklaruar mënyrën se si i ka blerë tre apartamente, është shembulli më i qartë i kësaj”.
“Sipas dokumenteve të bëra publike nga emisioni investigativ, Dumani jo vetëm që nuk e justifikon me rrogë këtë pasuri, por në mënyrë fiktive ka deklaruar se ka blerë shtëpi në zona elitare të Tiranës me çmime që as në periferi nuk ekzistojnë”, tha Balliu.
Sipas tij, “duket se komisioni i vetingut, në rastin më të mirë nuk ka kryer hetim të thelluar për këtë çështje, dhe në rastin më të keq nuk ka kryer hetim fare”.
Balliu theksoi se KPK është mjaftuar me deklarimet e Dumanit dhe nuk ka kryer asnjë analizë të burimeve në fjalë.
Discussion about this post