Partia Demokratike, përmes një shkrese zyrtare dërguar Komisionit Qendror të Zgjedhjeve, i ka kërkuar kësaj të fundit dokumentacionin e procesit të votimit të shqiptarëve nga diasora.
Kërkesa, e firmosur nga Sekretari i Përgjithshëm i PD-së, Flamur Noka, konstaton 8 pika.
Pika e parë lidhet me dokumentacionin juridiko-ligjor që vërteton se çdo emigrant i regjistruar në platformën PER ka marrë dhe dorëzuar zarfin personalisht, ka firmosur vetë dhe ka paraqitur mjet identifikimi.
Së dyti, demokratët kërkojnë inventarin e zarfeve të diasporës, ato që janë të papërdorura, vendndodhjen aktuale të tyre dhe kshtet e sigurisë.
Pika e tretë parashikon vendosjen në dispozicion numrin e fletëve të vulosura nga KQZ-ja, por që nuk janë shpërndarë, duke përfshirë dhe ato të fondit rezervë.
Së katërti, PD-ja kërkon numrin e sasisë së zarfave të papërdorura A dhe B, si dhe vendndodhjen e tyre aktuale.
Së pesti, kërkohet sa zarfa janë dorëzuar tek DHL-ja, sa janë kthyer pas si të parregullta për t’u marrë në administrim shpërndarje nga kompania postare, si dhe ato që janë kthyer nga DHL-ja pas dorëzimit dhe marrjes së zarfave nga votuesi emigrant.
Pika e gjashtë shtron kërkesën për numrin e emigrantëve që rezultuan me adresa të pasakta, e që kërkuan saktësim pas përfundimit të afatit të regjistrimit në platformën PER.
Po kështu demokratët kërkojnë kopje të manifestit të dërgesave ditore për zarfat e dërguara e ato të mbërritura, të njëhsuara me origjinalin.
Së fundmi, Partia Demokratike kërkon procesverbalet mbi gjendjen numerike dhe fizike të dërgesave postare që DHL-ja ka raportuar në zonën doganore dhe ka administruar në ambientet e dedikuara postare. Kjo pikë parashikon dhe informacionin nëse ka pasur ndërhyrje në ndonjë rast nga ana e autoriteteve doganore apo policore mbi zarfat.
Kujtojmë se Partia Demokratike ka ngritur akuza se zarfat me fletët e votimit në diasporë nuk u dorëzohen emigrantëve në dorë në banesë, por përvetësohen në mënyrë të organizuar nga disa individë që përdorin makina me targa shqiptare për shmangien e gjurmëve. Sipas demokratëve dyshohet se këta persona janë të lidhur me Partinë Socialiste dhe strukturat e saj.
Kjo shkresë e dërguar sot nga PD-ja te KQZ-ja, duket se konfirmon bindjen mes demokratëve për ndonjë parregullsi të mundshme me votat e diasporës, teksa Partia Socialiste përparoi në këto zgjedhje parlamentare.
Discussion about this post