“Kuvendi ka të drejtë të shkrijë partinë dhe rithemelimin e saj”, deklaroi ish-Presidenti i Republikës, Bujar Nishani, në një intervistë televizive. Sipas tij, kjo do të ndodhë para datës 8 dhjetor.
Ai tha se mbështetësit e Berishës kanë numrat për të kryer këtë aksion politik. “Berisha përfaqëson sot mazhorancën e PD”.
Më tej Nishani, foli për mundësinë e shkrirjes së partisë dhe hapësirën statutore.
“Unë kam besim se gjërat do të shkojnë siç duhet të kishin shkuar. Ne kemi shkuar tek Kuvendi Kombëtar nuk kemi ngelur tek Këshilli. Kuvendi ka të drejtë të shkrijë partinë dhe rithemelimin e saj. Por unë mendoj se përderisa ka një mazhorancë shumë të fortë brenda kësaj mund të bëhen ndryshime në status. Mund të shkohet edhe në një referendum për çështje të tjera, edhe për shkarkimin e Lulzim Bashës. Përvjetori i themelimit të PD do ta gjejë atë me një ndryshim të madh. Është momenti i një bashkimi i madh”, njoftoi Nishani.
“Dua të sjell një emocion që ndodh tek njerëzit. Kundërshtari politik margjinalizohet. Demokratët janë pushuar nga puna, nuk u hapen dyert. Pra demokratët duhet të vijnë në pushtet, për interesat e kujtdo. Sistemi politik është në krizë dhe me veprimin e fundit të zotit Basha është edhe në krizë identiteti”, deklaroi ish-Presidenti Nishani.
Duke kritikuar Lulzim Bashën për drejtimin aktual të partisë, Nishani nënvizoi krizën e identitetit të kryetarit.
“Deklaratat më të fundit, që reflektojnë një kuptim mbi mënyrën si është ndërtuar PD, si funksionon, çfarë mbartë PD, nga kryetari, tregon se ka një krizë identiteti PD sot. Të thuash dhe të konsiderosh qeverisjen e partisë, që ke marrë përsipër ta drejtosh, pra njërën prej pjesëve më të rëndësishme të kësaj partie, që është pikërisht qeverisja, si një lum, pavarësisht në kuptimin segmentar të saj, pa dyshim kjo tregon një reflektim shumë të rëndë, që ka të bëjë me krizën e identitetit”, deklaroi Nishani.
Sipas tij, PD është jo vetëm në një krizë të madhe politike dhe elektorale, por edhe në një krizë të madhe identitet, që duhet zgjidhur me çdo kusht.
